თბილისი, 28 იანვარი – Sputnik. საქართველოს შინაგან საქმეთა სამინისტროს სისტემაში საკადრო გადაადგილებები განხორციელდა. თანამდებობები დატოვეს კახეთის, გურიის, შიდა ქართლისა და სამცხე-ჯავახეთის რეგიონების პოლიციის უფროსებმა, იუწყება ტელეარხი Formula სამინისტროს ცნობაზე დაყრდნობით.
ტელეარხის ინფორმაციით, პოლიციის ყოფილი უფროსები რეგიონებს გაცვლიან. გურიის პოლიციის უფროსი კახა მურადაშვილი კახეთის პოლიციის უფროსი გახდება, ხოლო მის ადგილს სამცხე-ჯავახეთის პოლიციის ყოფილი უფროსი ლევან ხარაბაძე დაიკავებს. რაც შეეხება იმას, თუ ვინ იქნება სამცხე-ჯავახეთის რეგიონის პოლიციის უფროსი, ჯერ გადაწყვეტილი არ არის.
საკადრო გადაადგილებების მიზეზს შსს-ში ჯერჯერობით არ ასახელებენ.