თბილისი, 21 მაისი – Sputnik. შინაგან საქმეთა მინისტრმა გიორგი მღებრიშვილმა საქართველოში სტუმრად მყოფ ევროპარლამენტის საგარეო საქმეთა კომიტეტის უშიშროებისა და თავდაცვის ქვეკომიტეტის დელეგაციას უმასპინძლა, იუწყება შსს–ს პრეს–სამსახური.
მინისტრმა სტუმრებს შსს–ს მიერ საქართველოს ვიზალიბერალიზაციის სამოქმედო გეგმის ფარგლებში გატარებული რეფორმები გააცნო, რომელთა შედეგებიც ევროკომისიის ანგარიშში პოზიტიურად აისახა.
მღებრიშვილმა განსაკუთრებული ყურადღება გაამახვილა საქართველოსა და ევროპის სამართალდამცავ სტრუქტურებს შორის საპოლიციო თანამშრომლობის გაფართოებაზე.
ევროპარლამენტის დელეგაციის წევრებმა მინისტრს ევროკავშირის წევრი ქვეყნების სამართალდამცავ სტრუქტურებთან აქტიური თანამშრომლობისთვის მადლობა გადაუხადეს და საქართველოსთვის შენგენის ქვეყნებში უვიზო რეჟიმის მინიჭებასთან დაკავშირებით მტკიცე მხარდაჭერა გამოხატეს.