თბილისი, 11 ივნისი — Sputnik. ოფიციალური მოსკოვი შეშფოთებულია აშშ-ის მიერ თავისი მედიკო-ბიოლოგიური ლაბორატორიების რუსეთის საზღვრებთან ახლოს, მათ შორის საქართველოში განთავსებით, აღნიშნულია რუსეთის ფედერაციის საგარეო საქმეთა სამინისტროს განცხადებებში, იუწყება რუსული საინფორმაციო სააგენტო ”რია ნოვოსტი”.
”დიდ შეშფოთებას იწვევს პენტაგონის საქმიანობა თავისი მედიკო-ბიოლოგიური ლაბორატორიების უშუალოდ რუსეთის საზღვრებთან ახლოს განთავსების გამო”, — აღნიშნულია ხუთშაბათს რუსეთის საგარეო პოლიტიკური უწყების ვებგვერდზე გამოქვეყნებულ კომენტარებში.
სამინისტროში აღნიშნეს, რომ ამ თვალსაზრისით განსაკუთრებით თვალსაჩინოა თბილისის გარეუბანში მდებარე ”რ. ლუგარის სახელობის საზოგადოებრივი ჯანდაცვის კვლევითი ცენტრი” — ბიოლოგიური იზოლაციის უმაღლესი დონის ლაბორატორია.
ოფიციალური მოსკოვი აცხადებს, რომ ამ ლაბორატორიის ჭერქვეშ დამკვიდრდა ”აშშ-ის სახმელეთო ჯარის კვლევითი ქვედანაყოფი, რომელიც აშშ-ის სახმელეთო ჯარების უ. რიდის სახელობის კვლევითი ინსტიტუტის ფილიალია”.
”ამერიკისა და საქართველოს ხელისუფლებები აშშ-ის არმიის ამ სამხედრო ქვედანაყოფის ჭეშმარიტი საქმიანობის შინაარსისა და მიმართულებების დასამალავად ძალისხმევას არ იშურებენ, რომელიც განსაკუთრებით საშიშ ინფექციურ დაავადებებს იკვლევს. პენტაგონი ცდილობს, ასეთივე შენიღბული სამხედრო მედიკო-ბიოლოგიური ობიექტები დსთ-ის სივრცეში სხვა სახელმწიფოებშიც განათავსოს”, — მიაჩნიათ მოსკოვში.
