საქართველოს საფეხბურთო ნაკრებმა კოპენჰაგენში დანიის გუნდთან გამანადგურებელი ანგარიშით 1:5 წააგო. იხილეთ „Sputnik-საქართველოს“ ფოტოკადრები, თუ როგორ მიმდინარეობდა შეხვედრა.
მასპინძლებმა კასპერ დოლბერგის ზუსტი დარტყმის შედეგად ანგარიში მე-13 წუთზე გახსნეს. თუმცა პირველი ტაიმის შუაში ქართულმა გუნდმა ანგარიშის გათანაბრება შეძლო. გოლი საბა ლობჟანიძემ გაიტანა, რომელიც დანიის ჩემპიონატში თამაშობს.
30-ე წუთზე მასპინძელთა გუნდის კაპიტანმა კრისტიან ერიქსენმა 11-მეტრიანი დარტყმა ზუსტად შეასრულა და შესვენებაზე გუნდები 2:1 ანგარიშით გავიდნენ.
მეორე ტაიმში დანიელი ფეხბურთელები კვლავ უპირატესობით სარგებლობდნენ. დოლბერგმა დუბლი შეასრულა, მეოთხე გოლი გაიტანა იუსუფ პოულსენმა, ბოლო გოლის ავტორი კი დამატებით წუთებზე მარტინ ბრეიტვეიტი გახდა.
ეს მარცხი საქართველოს ნაკრებისთვის ევრო-2020-ის შესარჩევ ციკლში რიგით მესამე იყო. D ჯგუფში ოთხი ტურის შემდეგ ვლადიმერ ვაისის ფეხბურთელებმა სამი ქულა მოაგროვეს და მეოთხე ადგილს იკავებენ. ჯგუფის ლიდერი კვლავ ირლანდიაა 10 ქულით, დანიამ კი მეორე ადგილზე გადაინაცვლა 5 ქულით.
ევრო-2020-ის შესარჩევი ციკლი სექტემბერში გაგრძელდება და შემდეგ მატჩს საქართველოს ნაკრები თბილისში გამართავს დანიის წინააღმდეგ.
