მკვლელობის მცდელობისათვის გასამართლებული დეკანოზი გიორგი მამალაძის ძმა საქართველოს საპატრიარქოსთან მრავალდღიან აქციას მართავს. იხილეთ „Sputnik-საქართველოს“ ფოტოკადრები, თუ როგორ მიმდინარეობს აქცია, რომელსაც საპატრიარქომ "ეკლესიაზე ზეწოლა" უწოდა.
თორნიკე მამალაძის მიერ ორგანიზაებული აქცია უკვე მეორე კვირაა გრძელდება, რაც საქართველოს საპატრიარქოსთვის "მიუღებელი" აღმოჩნდა. ამასთან დაკავშირებით გასულ კვირაში სპეციალური განცხადება გავრცელდა.
დეკანოზი გიორგი მამალაძე გასამართლებულია პატრიარქ ილია მეორის მდივან-რეფერენტის შორენა თეთრუაშვილის მკვლელობის მცდელობისათვის.
დეკანოზი 2017 წლის 10 თებერვალს დააკავეს თბილისის აეროპორტში, როცა ის გერმანიაში გამგზავრებას აპირებდა. მაშინ გერმანიაში სამკურნალოდ იმყოფებოდა კათოლიკოს-პატრიარქი. გამოძიების მონაცემებით, მამალაძის ბარგში აღმოაჩინეს ნატრიუმის ციანიდი, ხოლო ბინაში – კუსტარულად დამზადებული ცეცხლსასროლი იარაღი და ექვსი ვაზნა.
