თბილისი, 12 მაისი — Sputnik. თბილისის შოთა რუსთაველის საერთაშორისო აეროპორტი Skytrax World Airport Awards 2020-ზე ზედიზედ მეშვიდედ დასახელდა აღმოსავლეთ ევროპის საუკეთესო აეროპორტების ჩამონათვალში, ნათქვამია აეროპორტის Facebook-გვერდზე გავრცელებულ განცხადებაში.
Skytrax - გავლენიანი ბრიტანული საკონსულტაციო კომპანიაა, რომელიც მსოფლიოს აეროპორტებსა და ავიაკომპანიებში მომსახურების ხარისხს მრავალი წელია იკვლევს და აფასებს. Skytrax World Airport Awards-ის ექსპერტები მსოფლიოს 550 აეროპორტის 106 სხვადასხვა ეროვნების 13 მილიონზე მეტი მგზავრის შეფასებას ეყრდნობიან.
მგზავრთა გამოკითხვის შედეგად გამოვლინდა აღმოსავლეთ ევროპის ათი საუკეთესო აეროპორტი. თბილისის გარდა, ათეულში შევიდნენ ბუდაპეშტის, ტალინის, კიევი-ბორისპოლის, ბუქარესტის, ბელგრადის, ბრატისლავის, რიგის, სკოპიესა და სოფიის აეროპორტები.
თბილისის საერთაშორისო აეროპორტს მართავს თურქული კომპანია TAV-Georgia – TAV Airports Holding-ის შვილობილი კომპანია, რომელმაც საქართველოში საქმიანობა 2005 წელს დაიწყო და 2027 წლამდე გააგრძელებს.
ამ დროის მანძილზე კომპანიამ თბილისის აეროპორტში 180 მლნ დოლარზე მეტი ინვესტიცია განახორციელა – 2007 წელს განახლდა ასაფრენ–დასაფრენი ზოლი, გაიხსნა ახალი სამგზავრო ტერმინალები.
TAV-Georgia-ში დღეისათვის 1,3 ათასი ადამიანია დასაქმებული.
