თბილისი, 14 ივნისი — Sputnik. ქართველი მომღერალი ნატალია ქუთათელაძე, რომელიც BBC-ს მუსიკალურ კონკურსში მონაწილეობს, პირველი რაუნდის გამარჯვებული გახდა, ნატალია რამდენიმე დღეში ფინალურ ტურში იმღერებს.
13 ივნისს ეკა მამალაძის უმშვენიერესმა ქალიშვილმა, მეცო-სოპრანო ნატალია ქუთათელაძემ „დეივიდს ჰოლის“ საკონცეტრო დარბაზში Samson, recherchant me présence ... Amour! Viens aider ma faiblesse Samson et Dalila Saint-Saëns არია შეასრულა და პირველი რაუნდის გამარჯვებული გახდა.
„ცოტა შოკირებული ვარ, მაგრამ ამავდროულად ვარ მადლობელი. ვამაყობ აქ მყოფი თითოეული ადამიანით, რადგან მათ დიდი საქმე შეასრულეს. მადლობელი ვარ იმ გარემოსი, რომელსაც ეს კონკურსი ქმნის. ვგრძნობ უდიდეს მხარდაჭერას ამ აუდიტორიისგან და ამისთვისაც მადლობელი ვარ, ასევე მადლობა ჩემს საოცარ კოლეგებს“, – თქვა ნატალიამ გამარჯვების შემდეგ.
ნატალიას გამარჯვებას გამოეხმაურნენ სოციალურ ქსელშიც, კონკურსის მაყურებლებმა მეცო-სოპრანოს ნამღერი დადებითად შეაფასეს.
როგორც BBC წერს, კონკურსს რამდენიმე გამარჯვებული ეყოლება, მთავარი პრიზის მფლობელი 20 000 ფუნტ სტერლინგსა და თასს მიიღებს. მეორე გამარჯვებული სიმღერის მიხედვით შეირჩევა და საჩუქრად 10 000 ფუნტ სტერლინგსა და ასევე თასს მიიღებს. ხოლო მესამე გამარჯვებულს მაყურებლები შეარჩევენ, მას 2 500 ფუნტი სტერლინგი და კრისტალის თასი გადაეცემა. კონკურსს მთელ ბრიტანეთში გაუშვებენ, ქართველი მაყურებელი კი მას ინტერნეტში რამდენიმე დღეში იხილავს.
2020 წელს პანდემიის გამო კონკურსი ჩაიშალა და წელს ერთწლიანი პაუზის შემდეგ ბრიტანეთმა გრანდიოზულ ცერემონიას კვლავ უმასპინძლა.
აღსანიშნავია, რომ ეკა მამალაძის უმშვენიერესი ქალიშვილი ორსულად არის, ნატალია მალე დედა გახდება. პანდემიის მიუხედავად მომღერალი არაფერს უშინდება და წარმატებით მიიწევს წინ.
BBC CARDIFT SINGER OF THE WORLD 2021 მსოფლიოში ერთ-ერთი ყველაზე პრესტიჟული ოპერის მომღერალთა კონკურსია, რომელიც ყოველ წელს ბრიტანეთში იმართება და სხვადასხვა ქვეყნის ოპერის მომღერლები დიდი ბრიტანეთს თავიანთი ნიჭის დემონსტრაციის მიზნით სტუმრობენ. BBC CARDIFT SINGER OF THE WORLD 2021 ხუთი ტურისგან შედგება და თითოში 3-4 ოპერის მომღერალი გამოდის. წელს კონკურსს 15 ქვეყნიდან 16 მონაწილე ჰყავს. პირველი ტური 13 ივნისს უკვე გაიმართა 19-ში კი ფინალური ტური გაიმართება.
