თეირანში ერთადერთ ქართულ ტაძარს რესტავრაცია ჩაუტარდება

© photo: Georgian Heritage / FBქართული ტაძარი-აკლდამა თეირანში
ქართული ტაძარი-აკლდამა თეირანში - Sputnik საქართველო
გამოწერა
ტაძარი-სამლოცველო, რომელშიც ქართველი მეცენატის მეუღლე განისვენებს, სასწრაფო რესტავრაციას მოითხოვს

თბილისი, 6 თებერვალი — Sputnik. პატარა ეკლესიას, რომელიც ХХ საუკუნეში ირანის დედაქალაქში ააგო ცნობილმა საზოგადოებრივმა მოღვაწემ, მეწარმემ და მეცენატმა აკაკი ხოშტარიამ, უახლოეს მომავალში რესტავრაცია ჩაუტარდება.

ამ განსასვენებელში, დულაბის მართლმადიდებლურ სასაფლაოზე განისვენებს ხოშტარიას მეუღლე, მინადორა თურქია (1881—1924). მეუღლისთვის შეკვეთილი აკლდამა ქართული საეკლესიო არქიტექტურის ტრადიციებშია აგებული. აღსანიშნავია, რომ სამლოცველო ირანში ქართული საეკლესიო არქიტექტურის ერთადერთი ნიმუშია.

© photo: Georgian Heritage / FBქართული ტაძარი-აკლდამა ტეირანში
თეირანში ერთადერთ ქართულ ტაძარს რესტავრაცია ჩაუტარდება - Sputnik საქართველო
ქართული ტაძარი-აკლდამა ტეირანში

სარესტავრაციო სამუშაოებს საქართველოს კულტურული მემკვიდრეობის დაცვის ეროვნული სააგენტო ირანულ მხარესთან პარტნიორობით განახორციელებს. სამუშაო ჯგუფი უკვე ეწვია თეირანს, სააგენტოს არქიტექტორ-რესტავრატორებმა ორგანიზაციის დირექტორის მოადგილის, პაატა გაფრინდაშვილის ხელმძღვანელობით დეტალურად შეისწავლეს ძეგლი და სამოქმედო გეგმა დასახეს.

როგორც უწყებაში აღნიშნავენ, მარმარილოს ნაგებობა გადაუდებელ სარესტავრაციო ჩარევას მოითხოვს.

ოშკის ტაძარი - Sputnik საქართველო
ქართველი ექსპერტები თურქეთში ოშკის ტაძრის რესტავრაციის პროცესს გაეცნენ

„ანაზომებისა და ფოტო მასალის მიხედვით სააგენტო მიმდინარე წელსვე უზრუნველყოფს რეაბილიტაციის საპროექტო დოკუმენტაციის მომზადებას. სარეაბილიტაციო სამუშაოები კი ირანის კულტურული მემკვიდრეობის, ხელნაკეთებისა და ტურიზმის დეპარტამენტთან უახლოეს თვეში გაფორმებული მემორანდუმის საფუძველზე წარიმართება. ფიზიკური სამუშაოები წელსვე დაიწყება და მას საქართველოს მხარე დააფინანსებს“, - ნათქვამია სააგენტოს განცხადებაში.

გარდა ამისა, 7 დღიანი ვიზიტის მსვლელობისას ირანის კულტურული მემკვიდრეობის კვლევის ცენტრთან და ისპაჰანის პროვინციის ძეგლთა დაცვით უწყებებთან ერთად დაიგეგმა სამომავლო ურთიერთობის ფართო სპექტრი, რომლებიც კულტურული მემკვიდრეობის სფეროში მხარეთა გრძელვადიანი თანამშრომლობის მიმართულებებს განსაზღვრავენ.

ყველა ახალი ამბავი
0