თბილისი, 28 ნოემბერი — Sputnik. თბილისის მე-19 საერთაშორისო კინოფესტივალს ბრიტანელი საკულტო კინორეჟისორი, მწერალი და არაერთი გამოფენის კურატორი პიტერ გრინუეი დაესწრება.
კინოფესტივალის ორგანიზატორების განცხადებით, ღონისძიებაზე, რომელიც 3-დან 9 დეკემბრამდე გასტანს, დაგეგმილია როგორც გრინუეის მასტერ-კლასები, ისე მისი 2015 წელს გადაღებული ფილმის „ეიზენშტეინი გუანაჰუატოში“ ჩვენება.
პიტერ გრინუეი თანამედროვეობის ერთ-ერთი ყველაზე იდუმალი, ამბიციური და საკამათო კინორეჟისორია. მისი სურათების უმეტესობაში იგრძნობა ფლამანდიური ფერწერის, რენესანსისა და ბაროკოს ეპოქების ძლიერი გავლენა. გარდა ამისა, გრინუეი გახლავთ ათობით წიგნის ავტორი და ბევრს ექსპერიმენტატორობს ახალი ტექნოლოგიებით.
ყველაფერთან ერთად, პიტერ გრინუეი ცნობილია თავისი პარადოქსული განცხადებებითაც. მაგალითად, მისი აზრით, ტრადიციული კინო 198ე წელს გარდაიცვალა, როდესაც ტელევიზორებისთვის დისტანციური მართვის პულტი შეიქმნა.
თბილისის საერთაშორისო კინოფესტივალს წელს მეცხრამეტედ ატარებს კინოხელოვნების ცენტრი „პრომეთე“ _ განათლების, მეცნიერების, კულტურისა და სპორტის სამინისტროს მხარდაჭერით. ფესტივალის ფარგლებში, გარდა მთავარი ეროვნული და საერთაშორისო კონკურსებისა, ასევე ტარდება სპეციალური კინოჩვენებები, პიტჩინგები (კინოპროექტების პრეზენტაციები ინვესტორების მოძიების მიზნით“, ტრენინგები და უცხოელი რეჟისორების მასტერკლასები.
კინოფესტივალის გამარჯვებულებს გადაეცემათ პრიზები: „ოქროს პრომეთე“ - საუკეთესო ფილმისთვის და „ვერცხლის პრომეთე“ - საუკეთესო რეჟისურისთვის.
