თბილისი, 12 ივნისი - Sputnik. სომხეთის პრემიერ-მინისტრის მოვალეობის შემსრულებელმა ნიკოლ ფაშინიანმა სააგიტაციო მიტინგზე განაცხადა, რომ ქვეყანაში ხალხის წინააღმდეგ ელიტის კლასობრივი ბრძოლა მიმდინარეობს, წერს РИА Новости.
მისი თქმით, მომავალი საპარლამენტო არჩევნების მიზანს არ წარმოადგენს ის, „იქნება თუ არა ხელისუფლებაში მისი პოლიტიკური ძალა“.
„ეს არჩევნები იმის შესახებაა, იქნებით თუ არა თქვენ ხელისუფლებაში. აქ მიდის ელიტის და ხალხის ომი. ცხადია, რომ ომი (ყარაბაღის კონფლიქტის ესკალაცია - რედ.) და ომისშემდგომი სიტუაცია მხოლოდ საბაბი იყო. ეს კლასობრივ ბრძოლაში გადაიზარდა. ეს იქცა ელიტის ომად ხალხის და მოქალაქის, საკუთარი ხალხის წინააღმდეგ. ისინი მებრძვიან, რადგან ჩემი შვილი ყიდის ლუდს, ისევე როგორც თქვენი შვილები“, - განაცხადა ფაშინიანმა.
პრემიერის მოვალეობის შემსრულებლის თქმით, მისი „ვაჟი არ აყენებს საკუთარ თავს სხვა ადამიანების შვილებზე მაღლა“.
„ეს კი არღვევს მათ მიერ აგებულ პირამიდას, რადგან მათი შვილები უნდა იყონ სხვებზე მაღლა, მათ მილიონები უნდა იშოვონ... შესაბამისად, სომხეთში დაიწყო და მიმდინარეობს არაძალადობრივი, რკინის, სახალხო რევოლუცია“, - განაცხადა ფაშინიანმა.
სომხეთში ვადამდელი საპარლამენტო არჩევნები 20 ივნისს არის დანიშნული. არჩევნებში მონაწილეობას 25 პოლიტიკური ძალა მიიღებს - 21 პარტია და 4 ბლოკი.
