თბილისი, 21 ნოემბერი - Sputnik. სომხეთში შეაჩერეს სიტყვისა და მედიის თავისუფლების კუთხით სამხედრო მდგომარეობის პირობებში შემოღებული შეზღუდვების მოქმედება, იუწყება РИА Новости საკონსტიტუციო სასამართლოზე დაყრდნობით.
სასამართლოში განმარტეს, რომ აკრძალვა დროებით მოხსნილია იმ გადაცემების გამოქვეყნებაზე, რომლებიც სომხეთის და ყარაბაღის თავდაცვით უნარიანობას ეჭვქვეშ აყენებს.
აღნიშნული გადაწყვეტილება ადამიანის უფლებათა დამცველის, არმან ტატოიანის მიმართვის საფუძველზეა მიღებული.
„შეჩერებულია ასევე იმ პუნქტის მოქმედება, რომლის თანახმად იკრძალება ისეთი გადაცემების ეთერში გასვლა, რომლებიც ეჭვქვეშ აყენებენ ან აუფასურებენ თანამდებობის პირთა, სახელმწიფო და ადგილობრივი მმართველობის ორგანოთა საქმიანობას, რომელიც სამხედრო მდგომარეობის და სახელმწიფო უსაფრთხოების სამართლებრივი რეჟიმის უზრუნველყოფაზეა მიმართული“, - აღნიშნულია განცხადებაში.
ერევანში ბოლო დღეებში ოპოზიცია მართავს საპროტესტო აქციებს ფაშინიანის გადადგომის მოთხოვნით, რადგან მან 10 ნოემბერს ყარაბაღში ცეცხლის შეწყვეტის შესახებ ერთობლივ შეთანხმებას მოაწერა ხელი. დოკუმენტს ხელს აწერენ რუსეთის, სომხეთის და აზერბაიჯანის ლიდერები. შეთანხმების თანახმად, სომხეთი და აზერბაიჯანი რჩებიან დაკავებულ პოზიციებზე, მთიანი ყარაბაღის ტერიტორიაზე კი შედიან რუსი სამშვიდობოები. ისინი განთავსდებიან მხარეთა გამყოფ ზოლზე და დერეფნის გასწვრივ, რომელიც ყარაბაღს სომხეთთან აკავშირებს. ბაქომ და ერევანმა ტყვეების გაცვლაზე მოილაპარაკეს. სომხეთმა აზერბაიჯანს უნდა დაუბრუნოს ასევე ქელბაჯარის, ლაჩინისა და აღდამის რაიონები.
