არჩევნების მეორე ტური კიდევ ერთ ერთმანდატიან ოლქში ჩატარდება

© Sputnik / Vladimir Umikashviliკენჭისყრა საარჩევნო უბანზე
კენჭისყრა საარჩევნო უბანზე - Sputnik საქართველო
გამოწერა
ბიულეტენები არასწორად გაიცა, რადგან იქ სპეციალური უბანი იყო, შესაბამისად, კენჭისყრა გაუქმდა, განაცხადა ცესკოს თავმჯდომარემ.

თბილისი, 4 ნოემბერი – Sputnik. მცხეთა-მთიანეთის საოლქო კომისიამ ქსნის საპატიმროს უბანში მაჟორიტარული კენჭისყრის შედეგების გაუქმების გადაწყვეტილება მიიღო, შედეგად – რეგიონში მეორე ტური ჩატარდება, განაცხადა ცენტრალური საარჩევნო კომისიის თავმჯდომარემ თამარ ჟვანიამ.

წინასწარი მონაცემებით ცნობილი იყო, რომ მეორე ტური 16 ოლქში გაიმართებოდა, საიდანაც რვა – თბილისში. ამ მონაცემებით მცხეთის ოლქში „ქართული ოცნების“ კანდიდატი პირველივე ტურში იმარჯვებდა.

თამარ ჟვანია - Sputnik საქართველო
თამარ ჟვანია: არჩევნების მეორე ტური ნებისმიერ შემთხვევაში გაიმართება

„სულ ახლახან მცხეთაში დასრულდა საოლქო საარჩევნო კომისიის სხდომა... იყო მიღებული გადაწყვეტილება, რომ ამ ციხეში შედეგების მაჟორიტარული ნაწილი გაუქმდა, რაც ფაქტობრივად იწვევს წინასწარი მონაცემებით ისეთ სურათს, რომ შესაძლებელია მეორე ტური ასევე გაიმართოს მცხეთის იმ კონკრეტულ მაჟორიტარულ ოლქში, რომელსაც მცხეთის საარჩევნო ადმინისტრაცია კურირებს“, – განაცხადა ჟვანიამ „პირველი არხის“ ეთერში.

მისი თქმით, ბიულეტენები არასწორად იყო გაცემული, რადგან იქ სპეციალური უბანი იყო, შესაბამისად, კენჭისყრა გაბათილდა.

ბოლო მონაცემებით, ქსნის ციხის უბანში კენჭისყრის შედეგების გაუქმებამდე მაჟორიტარულ საარჩევნო ოლქში მმართველი პარტიის კანდიდატი შალვა კერესელიძე ხმების 50,22%-ს იღებდა, ხოლო მისი კონკურენტი „ნაციონალური მოძრაობიდან" ცეზარ ჩოჩელი – 33,37%-ს.

ამასთან, მიუხედავად ახალი გადაწყვეტილებისა, არჩევნების შედეგების აღიარებაზე ყველა ოპოზიციურმა პარტიამ უკვე განაცხადა უარი. ისინი ასევე არ აპირებენ მაჟორიტარული არჩევნების მეორე ტურში მონაწილეობას.

ყველა ახალი ამბავი
0