თბილისი, 1 ნოემბერი – Sputnik. შინაგან საქმეთა სამინისტრომ ქვეყნის მასშტაბით, არჩევნების დღეს სულ სისხლის სამართლის 12 საქმეზე დაიწყო გამოძიება, ამის შესახებ შინაგან საქმეთა მინისტრის მოადგილე კახა საბანაძემ საგანგებოდ გამართულ ბრიფინგზე განაცხადა.
საბანაძის ინფორმაციით, ასევე ადმინისტრაციული საქმის წარმოება დაიწყო პოლიციის კომპეტენციის კუთვნილ 16 ფაქტზე.
მისი განცხადებით, პოლიციამ არჩევნების მიმდინარეობისას ცხრა პირი დააკავა.
„დაკავებულია ცხრა პირი, მათ შორის გლდანში N39 საჯარო სკოლაში განთავსებული საარჩევნო უბნის მიმდებარე ტერიტორიაზე მომხდარ ინციდენტთან დაკავშირებით“, – განაცხადა საბანიძემ.
როგორც მინისტრის მოადგილემ აღნიშნა, შინაგან საქმეთა სამინისტრო აქტიურად თანამშრომლობს სხვადასხვა ორგანიზაციასთან.
„შინაგან საქმეთა სამინისტრო აქტიურად თანამშრომლობს საერთაშორისო სადამკვირვებლო მისიებთან, ადგილობრივ არასამთავრობო ორგანიზაციებთან და სახალხო დამცველის აპარატთან. პოლიციის კომპეტენციას მიკუთვნებულ საკითხებზე თანამშრომლობის მიზნით, სამინისტროში გამოყოფილი არიან შესაბამისი საკონტაქტო პირები“, – განაცხადა საბანიძემ.
კახა საბანაძემ მადლობა გადაუხადა მათ აქტიური თანამშრომლობისთვის, როგორც წინასაარჩევნო პერიოდში, ასევე არჩევნების დღეს.
საქართველოში 31 ოქტომბერს პარლამენტის არჩევნები გაიმართა, რომელშიც 48 პარტია და ორი საარჩევნო ბლოკი მონაწილეობდა. საქართველოში არჩევნები პანდემიის პირობებში ჩატარდა.
2020 წლის საპარლამენტო არჩევნები საქართველოში შერეული სისტემით ჩატარდა. ქვეყნის მოსახლეობამ 150 დეპუტატი უნდა აირჩიოს საკანონმდებლო ორგანოში — 120 პროპორციული და 30 მაჟორიტარული წესით. საპარლამენტო არჩევნების პარალელურად, გაიმართა აჭარის უმაღლეს საბჭოს, ასევე მერების რიგგარეშე და საკრებულოების შუალედური არჩევნები.
