თურქეთი უკრაინის საკითხზე მოლაპარაკებების განახლებაზე მუშაობს

თბილისი, 19 აპრილი – Sputnik. თურქეთი უკრაინაში მიმდინარე კონფლიქტის მოსაგვარებლად მოლაპარაკებების უახლოეს პერსპექტივაში განახლებაზე აქტიურად მუშაობს, იუწყება РИА Новости თურქეთის მთავრობაში წყაროზე დაყრდნობით.

„ჩვენ მჭიდრო კავშირი გვაქვს დაინტერესებულ მხარეებთან და ვიმედოვნებთ, რომ პოლიტიკური ნების არსებობის შემთხვევაში, სამშვიდობო პროცესი ძალიან მოკლე ვადებში განახლდება“, — განუცხადა სააგენტოს წყარომ.

მისი თქმით, თურქეთი საკითხის კვლავაც დიპლომატიური მოგვარების მომხრეა და მზადაა, მხარეებს მოლაპარაკებებისთვის შესაბამისი პლატფორმა დაუთმოს.

ორი ქვეყნის ლიდერის შესაძლო შეხვედრაზე საუბრისას, წყარომ აღნიშნა, რომ ეს შესაძლებლობა მხოლოდ დელეგაციებს შორის მოლაპარაკებების განახლებისა და „გარკვეული პროგრესის მიღწევის“ შემდეგ გაჩნდება.

მისი თქმით, სწორედ სამუშაო ჯგუფების საქმიანობამ უნდა მოამზადოს საფუძველი პოტენციური სამიტისთვის.

„წინასწარი შეთანხმებებისა და მოლაპარაკებების დონეზე საკვანძო საკითხების დამუშავების გარეშე, ლიდერების შედეგიანი შეხვედრის ორგანიზება შეუძლებლად მიგვაჩნია“, — დასძინა მან.

გასული წლის მაისში, ივნისსა და ივლისში რუსეთმა და უკრაინამ სტამბულში მოლაპარაკებების სამი რაუნდი გამართეს. შეხვედრების შედეგად განხორციელდა ტყვეთა გაცვლა და მიღწეულ იქნა შეთანხმება დაღუპული უკრაინელი სამხედროების ცხედრების გადაცემის შესახებ. გარდა ამისა, მხარეებმა კონფლიქტის მოგვარების თაობაზე მემორანდუმების პროექტები გაცვალეს.

მოგვიანებით, 2025 წლის ნოემბერში, უკრაინის საგარეო საქმეთა სამინისტრომ სტამბულის ფორმატში მოლაპარაკებების შეჩერების შესახებ განაცხადა, რის მიზეზადაც „ხილული პროგრესის“ არარსებობა დასახელდა. რუსეთის საგარეო უწყებაში აღნიშნულ მიზეზს „მოგონილი“ უწოდეს.

მოლაპარაკებების პირველი ორი რაუნდი აბუ-დაბიში 23-24 იანვარს და 4-5 თებერვალს გაიმართა. მესამე შეხვედრა ჟენევაში 17-18 თებერვალს გაიმართა. ყველა შეხვედრა მედიისთვის დახურულ კარს მიღმა ჩატარდა.

ახლო აღმოსავლეთში სიტუაციის ესკალაციის შემდეგ მოლაპარაკებები აღარ გამართულა. კრემლმა აღნიშნა, რომ მოსკოვიც და კიევიც ვაშინგტონთან დიალოგს საკუთარი არხებით აგრძელებენ.