თბილისი, 19 აპრილი — Sputnik. 2026 წლის პირველ კვარტალში ევროკავშირის ქვეყნებმა საქართველოს 698 მოქალაქის სამშობლოში დეპორტაციის შესახებ გადაწყვეტილება მიიღეს, რომელთაგან ექვსი პირის მიღებაზე საქართველომ რეადმისიის შესახებ შეთანხმების საფუძველზე უარი განაცხადა, ნათქვამია შინაგან საქმეთა სამინისტროს მიერ გავრცელებულ მასალებში.
დეპორტირებულთაგან 424 მამაკაცი, 104 ქალი და 164 არასრულწლოვანია. ყველაზე მეტი მოქალაქის დეპორტაცია (379 ადამიანი) განხორციელდა გერმანიიდან. შემდეგ მოდის საფრანგეთი (105), იტალია (41), პოლონეთი (30) და შვეიცარია (22).
შსს-ს ცნობით, საქართველოს ხელისუფლებამ 6 დეპორტირებულს რეადმისიის შეთანხმების საფუძველზე სამშობლოში დაბრუნების უფლება არ მისცა. მათი დეპორტაცია გერმანიიდან, საფრანგეთიდან, იტალიიდან და რუმინეთიდან იყო დაგეგმილი.
ევროკავშირის ქვეყნებთან საქართველოს მოქალაქეებისთვის უვიზო რეჟიმი 2017 წლის 28 მარტიდან ამოქმედდა. საუბარია შენგენის ზონის ქვეყნებში მოკლევადიან (180 დღის მანძილზე საერთო ჯამში 90 დღით) ტურისტულ, საქმიან და სტუმრის სტატუსით ვიზიტებზე.
საქართველოს მოქალაქეების დეპორტაცია ქვეყნის მიერ „უნებართვოდ მცხოვრებ პირთა რეადმისიის შესახებ“ გაფორმებული შეთანხმებების ფარგლებში ხორციელდება.
საქართველოს ხელისუფლებამ არაერთხელ მოუწოდა საკუთარ მოქალაქეებს, დაიცვან ევროკავშირის ქვეყნებში ყოფნის წესები, რადგან მათი დარღვევა უვიზო რეჟიმს საფრთხეს უქმნის. ქვეყანამ გაატარა რიგი ზომები იმისთვის, რათა არ დაუშვას სხვა ქვეყნებში არალეგალური მიგრაცია.
გარდა ამისა, ხელისუფლებამ გაამკაცრა კანონმდებლობა ევროკავშირის ქვეყნებთან უვიზო რეჟიმის დამრღვევთა წინააღმდეგ. რეადმისიასთან დაკავშირებული ყველა ხარჯი თავად კონკრეტულ პირს ეკისრება. ასევე გამკაცრდა გვარის გამოცვლის პროცედურები, რაც ხშირად სწორედ ამ პროცესთან იყო დაკავშირებული.