თბილისი, 12 მარტი — Sputnik. სამართალდამცველებმა ჯგუფურად ჩადენილი ყაჩაღობის ბრალდებით 4 პირი დააკავეს, ნათქვამია შინაგან საქმეთა სამინისტროს მიერ გავრცელებულ განცხადებაში.
უწყების ცნობით, დაკავებულთა ასაკი 19-დან 24 წლამდეა. გამოძიების მიხედვით, ბრალდებულები თბილისში უცხო ქვეყნის მოქალაქეს, 31 წლის მამაკაცს ყაჩაღურად თავს დაესხნენ, ფიზიკურად გაუსწორდნენ და გასტაცეს საფულე, ძვირადღირებული ტელეფონი და საათი, რის შემდეგაც შემთხვევის ადგილიდან მიიმალნენ.
მიღებული დაზიანებების შედეგად მამაკაცი კლინიკაში მოათავსეს, სადაც შესაბამისი სამედიცინო მკურნალობა ჩაუტარდა. უწყების ცნობით, მატერიალური ზიანი 10 ათას ლარს შეადგენს.
პოლიციამ ოთხივე თავდამსხმელი ბრალდებულის სახით დააკავა. გამოძიება საქართველოს სსკ-ის 179-ე მუხლით მიმდინარეობს, რაც 9 წლამდე ვადით თავისუფლების აღკვეთას ითვალისწინებს.