თბილისი, 10 თებერვალი — Sputnik. საქართველოს მთავრობამ, ოპტიმიზაციის ფარგლებში, ახალი სახელმწიფო სტრუქტურის — ქვეყნის ეკონომიკური განვითარების ბანკის შექმნის გადაწყვეტილება მიიღო, განაცხადა ეკონომიკის მინისტრმა მარიამ ქვრივიშვილმა.
ამისთვის ხელისუფლება მოქმედი „საქართველოს განვითარების ფონდისა“ და პროგრამა „აწარმოე საქართველოში“ ლიკვიდაციას განახორციელებს, რომელთა ბაზაზეც შეიქმნება აბსოლუტურად ახალი უწყება. უკვე მზად არის რეფორმის დადგენილება და პროცესი ოფიციალურად უახლოეს დღეებში დაიწყება.
„ჩვენ მზად ვართ, რომ სწორად ვუპასუხოთ ეკონომიკის ყველა დარგის გამოწვევას და ასევე ამ დარგებში ოპერირებადი მცირე და საშუალო, ისევე როგორც მსხვილი ბიზნესის წარმომადგენლების საჭიროებებს. „აწარმოე საქართველოში“ თავისი შინაარსით ძალიან დიდ მასშტაბს შეიძენს და რეალურად გახდება საქართველოს ეკონომიკის განვითარების ბანკი“, – განაცხადა ქვრივიშვილმა.
მისი თქმით, ახალი უწყება ქვეყნის ეკონომიკის ყველა სექტორს დაფარავს, თუმცა, აქცენტი გაკეთდება იმ სექტორებზე, რომლებსაც გამოკვეთილად დამატებითი ყურადღება სჭირდება, მათ შორის დაფინანსების გაზრდა.
„აქედან გამომდინარე, გამოვყოფდი წარმოებას, რათა შემცირდეს იმპორტზე დამოკიდებულება, ხელი შევუწყოთ კონკრეტული სექტორების განვითარებას, მათ შორის ენერგეტიკის – ამ კუთხით გარკვეული გამოწვევები გვაქვს და ჩვენთვის უმნიშვნელოვანესია, რომ ქვეყანაში იზრდებოდეს დადგმული სიმძლავრე", - განაცხადა ქვრივიშვილმა.
მინისტრის თქმით, ასევე, უკიდურესად მნიშვნელოვანია რომ ინვესტორებს, რომლებიც აწყდებიან პრობლემებს – იქნება ეს ფინანსებზე ხელმისაწვდომობა თუ სხვა რიგი ინსტრუმენტები.
როგორც ქვრივიშვილმა აღნიშნა, ინიციატივის გეგმის თანახმად, ფაქტობრივად, მიმდინარე პირველი კვარტლის ბოლოსთვის ძირითადი სამუშაოები უკვე შესრულებული იქნება, სტრუქტურა საკმაოდ მოცულობითი იქნება და, შესაბამისად, გარკვეული დრო დასჭირდება გუნდის სრულად ფორმირებას.
როგორც ადრე პრემიერმა ირაკლი კობახიძემ განაცხადა, ახალი სტრუქტურა ხელს შეუწყობს სახელმწიფო ფინანსების მართვის ოპტიმიზაციას.
სამთავრობო პროგრამა „აწარმოე საქართველოში“ ქვეყანაში ერთ-ერთი ყველაზე წარმატებულია. ის 2014 წლის ზაფხულში შეიქმნა და მიზნად ისახავს ადგილობრივი წარმოების სტიმულირებას. 2017 წლის აპრილში ამავე სახელწოდების სააგენტო შეიქმნა.
„განვითარების ფონდი“ „საპარტნიორო ფონდის“ საფუძველზე 2023 წელს შეიქმნა. „საპარტნიორო ფონდი“ სახელმწიფო საკუთრებაში არსებული საინვესტიციო ფონდია, რომელიც 2011 წელს დაარსდა. მისი მთავარი მიმართულება ინვესტიციების წახალისებაა საინვესტიციო პროექტების განვითარების ადრეულ ეტაპზე თანამონაწილეობის გზით.