თბილისი, 26 დეკემბერი — Sputnik. შინაგან საქმეთა სამინისტრომ 2025 წლის 27 დეკემბერს აქციების გამართვის პირობებთან დაკავშირებით ინფორმაცია გამოაქვეყნა.
როგორც ინფორმაციაშია ნათქვამი, დასაშვები აქციის ფორმაა შეკრება/მანიფესტაცია (მსვლელობა).
როგორც განცხადებაშია ნათქვამი, 2025 წლის 27 დეკემბერს აქციის მონაწილეებს შეკრების ადგილად განესაზღვრათ მელიქიშვილის ქუჩაზე მდებარე „თბილისის სახელმწიფო საკონცერტო დარბაზთან“ (ფილარმონია) და ასევე ილია ჭავჭავაძის გამზირი №1-ში მდებარე თბილისის სახელმწიფო უნივერსიტეტის პირველ კორპუსთან, და აღნიშნული მისამართებიდან დაიწყება მსვლელობა პ. მელიქიშვილის, მ. კოსტავას ქუჩებისა და შოთა რუსთაველის გამზირის გავლით საქართველოს პარლამენტის შენობის მიმდებარე ტერიტორიამდე.
შსს-ს განმარტებით, 2025 წლის 27 დეკემბერს აქცია უნდა დაიწყოს 18:00 საათზე, ხოლო დასრულდეს 23:55 საათზე.
შეკრების ჩატარებაზე პასუხისმგებელი პირიები არიან არჩილ გოჩიტაშვილი და ანტონ ქელბაქიანი; შეკრების თაობაზე გაფრთხილებები შსს-ში შეტანილია 2025 წლის 22 და 23 დეკემბერს.
საქართველოს შინაგან საქმეთა სამინისტროს მიერ გაცემული შესასრულებლად სავალდებულო მითითება:
მონაწილეებმა აქცია უნდა გამართონ იმგვარად, რომ საფრთხე არ შეექმნას საზოგადოებრივ უსაფრთხოებასა და მართლწესრიგს, ორგანოების, საწარმოების, დაწესებულებებისა და ორგანიზაციების ნორმალურ მუშაობას, ტრანსპორტის ან ხალხის შეუფერხებელ გადაადგილებას, ადამიანის სხვა უფლებებსა და თავისუფლებებს.
შეკრება ჩატარდეს მხოლოდ ხალხის სავალ ნაწილზე (ტროტუარზე) და მანიფესტაციის მონაწილეებმა ისარგებლონ არსებული მიწისქვეშა გადასასვლელით და მიჰყვნენ მითითებულ სვლაგეზს.
გარდა ამისა, შეკრება/მანიფესტაციის მონაწილეებმა მსვლელობის დასრულების შემდეგ, პროტესტი უნდა გამოხატონ საქართველოს პარლამენტის შენობასთან წინა ფასადზე არსებულ ასასვლელ კიბეებსა და მის მიმდებარედ არსებულ სივრცეში და არ უნდა შეაფერხონ ტროტუარზე მოძრავი სხვა მოქალაქეებისა და გზაზე მოძრავი სატრანსპორტო საშუალებების გადაადგილება.
თბილისში 2024 წლის ნოემბრიდან სისტემატურად საპროტესტო აქციები იმართება.