თბილისი, 13 დეკემბერი — Sputnik. ევროკავშირი საქართველოს მიმართ იყენებდა ოპონენტის გაჩუმების ტაქტიკას პოლიტიკური ბულინგის დახმარებით და ხელისუფლებას დემოკრატიულ უკუსვლაში ადანაშაულებდა, მაგრამ მსგავსი სამარცხვინო მეთოდების გამოყენება აშშ-თან არ გამოუვათ, განაცხადა პარლამენტის თავმჯდომარე შალვა პაპუაშვილმა.
გერმანიის ელჩმა პეტერ ფიშერმა წინა დღეებში უარი თქვა აშშ-ის ეროვნული უსაფრთხოების ახალი სტრატეგიის შესახებ კომენტარის გაკეთებაზე. ტელეკომპანია „იმედის“ ჟურნალისტს დიპლომატმა განუცხადა, რომ არ იყო ვალდებული ეპასუხა ასეთ კითხვებზე, უწოდა მათ პროპაგანდისტული მედია და ხაზგასმით აღნიშნა, რომ არ აპირებდა მონაწილეობა მიეღო ქართულ „პროპაგანდისტულ მანქანაში“.
„ცდილობდნენ პოლიტიკური ბულინგით გაეჩუმებინათ ის კრიტიკა, რომელიც ქართველი ხალხისგან ისმოდა ევროკავშირის მიმართ. თუ კაი ბიჭები არიან, ახლა გააჩუმონ აშშ და იქ სცადონ იგივე სამარცხვინო მეთოდები, რასაც ქართველი ხალხის წინაშე იყენებდნენ“, - განაცხადა პაპუაშვილმა.
მისი თქმით, ევროკავშირი ცდილობდა საქართველოს გაჩუმებას, რომ კრიტიკა არ გასულიყო მათ მოქალაქეებში, ქვეყანას ანტიდემოკრატიულობას და ანტიევროპულობას აბრალებდნენ.
„ეს იყო ჩვეულებრივი ოპონენტის გაჩუმების ტაქტიკა“, - აღნიშნა მან.
მან დასძინა, რომ ამ მხილების გამო საქართველოს ხელისუფლება იტანდა ზეწოლას და თავდასხმებს ევროკავშირის მხრიდან.
„დღეს ეს ყველაფერი უკვე მხილებულია. ვეღარავინ ბედავს მათ შორის ჩვენ შეგვეწინააღმდეგოს. რამდენიმე დღეა ამაზე ვსაუბრობთ. ვინმე გაგიგონიათ გავეკრიტიკებინეთ? იციან, იტყვიან რაღაცას, გადავამისამართებთ ამერიკის შეერთებულ შტატებთან და ელაპარაკონ მერე მათ“, - აღნიშნა პაპუაშვილმა.
ახალი სტრატეგია ასახავს აშშ-ს განახლებულ მიდგომებს გლობალური უსაფრთხოების ძირითად საკითხებთან დაკავშირებით. კერძოდ, მასში ნათქვამია, რომ უკრაინაში სამშვიდობო პროცესი შეერთებული შტატების ძირეულ ინტერესებში შედის და რომ ამერიკული პოლიტიკა ევროპაში, პირველ რიგში, რუსეთთან სტრატეგიული სტაბილურობის აღდგენას გულისხმობს.
POLITICO-სთან ინტერვიუში აშშ-ის პრეზიდენტმა დონალდ ტრამპმა ევროპას „სუსტი“ ადამიანების მიერ მართული ქვეყნების „გახრწნილი“ ჯგუფი უწოდა. ტრამპმა მკაცრად გააკრიტიკა აშშ-ის ტრადიციული მოკავშირეები მიგრაციის კონტროლისა და რუსეთსა და უკრაინას შორის კონფლიქტის მოგვარების უუნარობის გამო. მან ასევე მიანიშნა, რომ მხარს დაუჭერს ევროპელ პოლიტიკოსებს, რომლებიც იზიარებენ მის ხედვას კონტინენტის მომავლის შესახებ.