თბილისი, 11 ნოემბერი — Sputnik. სამართალდამცველებმა ნარკოდანაშაულის ბრალდებით ერთი პირი დააკავეს, ნათქვამია შინაგან საქმეთა სამინისტროს მიერ გავრცელებულ განცხადებაში.
40 წლის მამაკაცს, რომელიც წარსულში ნასამართლევი პირია, ბრალად ედება განსაკუთრებით დიდი ოდენობით ნარკოტიკული საშუალების უკანონო შეძენა-შენახვა, ასევე უკანონო რეალიზაციის ხელშეწყობა და განსაკუთრებით დიდი ოდენობით ნარკოტიკული საშუალების შემცველი მცენარის უკანონო დათესვა-მოყვანა.
გამოძიებით დადგინდა, რომ ბრალდებულს საცხოვრებელი სახლის ტერიტორიაზე მდებარე მიწის ნაკვეთში ფარულად, მიწის სიღრმეში მოწყობილი ჰქონდა სპეციალური სათბური, სადაც უკანონოდ მოჰყავდა ნარკოტიკული საშუალების შემცველი მცენარე.
აღნიშნული ტერიტორიის ჩხრეკისას პოლიციამ განსაკუთრებით დიდი ოდენობით - 283 ძირი მცენარე „კანაფი" და 3 კგ-მდე გამომშრალი „მარიხუანა" ნივთმტკიცებად ამოიღო.
ასევე ამოღებულია ნარკოტიკული საშუალების დაფასოებისთვის საჭირო მასალები, წებოვანი ლენტები და ელექტროსასწორი.
გამოძიება სსკ-ის 260-ე, 260 კვარტა და 265 პრიმა მუხლებით მიმდინარეობს.