თბილისი, 11 ნოემბერი — Sputnik. საჯარო მოხელეებს, სახელმწიფო საწარმოების თანამშრომლებსა და პოლიტიკური თანამდებობის პირებს იმ შემთხვევაში, თუ მათ ფინანსურ და სამოხელეო დანაშაულებში დამნაშავედ ცნობენ, ვალდებულება ექნებათ 30 წლის განმავლობაში წარადგინონ ქონებრივი მდგომარეობის შესახებ დეკლარაცია.
შესაბამის ცვლილებებს, რომელიც „კორუფციის წინააღმდეგ ბრძოლის შესახებ“ საქართველოს კანონში შევიდა, პარლამენტმა მესამე მოსმენით - 85 ხმით მხარი დაუჭირა.
საკანონმდებლო ცვლილებების ინიციატორი მმართველი პარტია „ქართული ოცნება-დემოკრატიული საქართველოა“. აღნიშნული საკანონმდებლო ცვლილების ინიციატორები მიიჩნევენ, რომ ახალი კანონი კორუფციის წინააღმდეგ ბრძოლას კიდევ უფრო ეფექტიანს გახდის, რაც გამოიხატება კონკრეტულ სამოხელეო თუ ფინანსური სარგებლის მიღებასთან დაკავშირებულ დანაშაულში მხილებული ადამიანების ქონებრივი მდგომარეობის 30 წლის მანძილზე აქტიურ დაკვირვებაში.
უმრავლესობის დეპუტატების შეფასებით, აღნიშნული კანონი უზრუნველყოფს მართლსაწინააღმდეგოდ მიღებული ქონების გამოვლენას, დანაშაულის პრევენციის ხელშეწყობას და იმ ზიანის ანაზღაურების შესაძლებლობას, რომელიც სახელმწიფოს თანამდებობის პირის დანაშაულებრივი ქმედების შედეგად მიადგა.
ბოლო თვეების განმავლობაში საქართველო ტენდერებთან დაკავშირებული კორუფციული სკანდალების ტალღამ მოიცვა. დაკავებულთა შორის არიან ეკონომიკის მინისტრის ყოფილი მოადგილე, თავდაცვის ყოფილი მინისტრი და რეგიონული განვითარებისა და ინფრასტრუქტურის მინისტრის ყოფილი მოადგილე.
საქართველოს მთავრობა კორუფციასთან ბრძოლას მთავარ პრიორიტეტად ასახელებს, თუმცა ბოლო დროს მომხდარი კორუფციული სკანდალები საზოგადოებაში ბევრ კითხვას ბადებს.
ეს ეხება მთავრობის უმაღლეს ეშელონებში არსებულ კორუფციას. კორუფციაში ბრალდებულებს შორისაა საქართველოს ყოფილი პრემიერ-მინისტრი ირაკლი ღარიბაშვილი, რომელმაც აღიარა, რომ რამდენიმე წლის განმავლობაში უკანონოდ იღებდა შემოსავალს.