საქართველოს მოქალაქეებს უვიზო რეჟიმის შეჩერებით აშანტაჟებენ - ბოჭორიშვილი

თბილისი, 13 დეკემბერი — Sputnik. საქართველოს მოქალაქეებს აშანტაჟებენ და აშინებენ უვიზო რეჟიმის შეჩერებით, მაგრამ ქვეყნის ხელისუფლება იმედოვნებს, რომ ევროკავშირის წევრი ქვეყნები სადამსჯელო ზომების შემოღების გადაწყვეტილებას არ მიიღებენ, განაცხადა საქართველოს საგარეო საქმეთა მინისტრმა მაკა ბოჭორიშვილმა.

ევროკავშირმა საქართველოში ბოლო დროს განვითარებული მოვლენების ფონზე და სავიზო რეჟიმის ლიბერალიზაციის საკითხებში პროგრესის არ არსებობის ან შეუსრულებლობის გამო შესაძლოა შეაჩეროს უვიზო მიმოსვლა „გარკვეული კატეგორიის პირთათვის“, ნათქვამია ევროკომისიის გასულ კვირას გამოქვეყნებულ ანგარიშში.

მინისტრი თითქმის 100% -ით დარწმუნებულია, რომ მსგავს მიდგომას ევროკავშირში არავინ გაიზიარებს და არ მოხდება იმგვარად, რომ საქართველოს მოსახლეობა დასაჯონ რაიმე სახით.

მისი თქმით, ევროკავშირი 16 დეკემბერს „დამატებით ზომებს განიხილავს“ საქართველოსთან დაკავშირებით თუმცა ქართულ მხარეს არ აქვს მოლოდინი, რომ ეს გადაწყვეტილებები იქნება იმ ფორმის, რომელიც ორმხრივ ურთიერთობებს დააზიანებს.

მანამდე ევროკავშირის ელჩმა საქართველოში პაველ ჰერჩინსკიმ განაცხადა, რომ ის, რაც ბოლო დღეებში საქართველოში ხდება, აშკარად სანქციებს მოითხოვს. მისი თქმით, სანქციების მომზადებაზე მუშაობა უკვე მიმდინარეობს და არ გამორიცხა, რომ მონაცემები 16 დეკემბერს იქნება წარდგენილი.

ამიტომ, როგორც მინისტრმა აღნიშნა, მოვლენებს წინ ნუ გავუსწრებთ.

„დაველოდოთ იმ განხილვებს, რა განხილვებიც უნდა იყოს ევროკავშირის წევრ ქვეყნებს შორის და იმ გზავნილებს, რომელსაც ჩვენ მოვისმენთ ბრიუსელიდან და რომლის ფარგლებშიც ჩვენ მოგვიწევს შემდგომ ბრიუსელთან მუშაობა“, - განაცხადა ბოჭორიშვილმა.

მისი თქმით, არის ევროკავშირის წევრ ქვეყნებს შორის ქვეყნები, რომლებიც სხვაგვარად ფიქრობენ და არიან ევროკავშირის წევრი ქვეყნები, რომლებიც ბევრად უფრო კრიტიკულები არიან საქართველოს ხელისუფლების მიმართ.

„თუმცა ევროკავშირში 27 ქვეყანაა და გადაწყვეტილებები ერთსულოვნად მიიღება, როდესაც საქმე ეხება მაგალითად სანქციებს ან სხვა სადამსჯელო ღონისძიებებს“, - განაცხადა მაკა ბოჭორიშვილმა.

ევროკავშირის საგარეო საქმეთა მინისტრები 18 ნოემბერს გამართულ შეხვედრაზე ქართველო ჩინოვნიკების წინააღმდეგ სანქციების დაწესებასა და საქართველოსთვის უვიზო რეჟიმის შეჩერების საკითხზე ვერ შეთანხმდნენ.

საქართველოს ხელისუფლების წარმომადგენლებისთვის სანქციების დაწესებას უნგრეთი და სლოვაკეთი ეწინააღმდეგებიან, ეჭვს გამოთქვამენ ბულგარეთი და იტალიაც. თავის მხრივ, გერმანია წინააღმდეგია, რომ ევროკავშირმა საქართველოს უვიზო მიმოსვლა შეუჩეროს.

საქართველოში „უცხოური გავლენის გამჭვირვალობის შესახებ“ კანონის მიღების შემდეგ აშშ-მა და ევროკავშირმა დაიწყეს ქვეყნისგან დისტანცირება - მთავრობისთვის დახმარების ნაწილი გაყინეს, ასევე შეჩერებულია ქვეყნის ევროკავშირში ინტეგრაციის პროცესი. შეერთებულმა შტატებმა საქართველოს ზოგიერთ მოქალაქეს სანქციები და სავიზო შეზღუდვები დაუწესა, მედიაში კი დაიწყო საუბრები ევროკავშირის მიერ უვიზო მიმოსვლის შესაძლო შეჩერებაზე.

ადრე პრემიერ-მინისტრმა ირაკლი კობახიძემ ევროკავშირის მიერ უვიზო რეჟიმის შესაძლო გაუქმების შესახებ განცხადებებს „იაფფასიანი შანტაჟის მცდელობა“ უწოდა.

ამჟამად საქართველო ევროკავშირის წევრობის კანდიდატი ქვეყანაა. ეს სტატუსი ქვეყანამ მიიღო 2023 წლის დეკემბერში, უკრაინასა და მოლდოვაზე ერთი წლით გვიან, რასაც საქართველოს ხელისუფლებამ უსამართლობა უწოდა.

ამასთან, საქართველომ 2023 წლის დეკემბერში მიიღო ევროკავშირის კანდიდატის სტატუსი და ცხრა ახალი პირობა, რომელიც ქვეყანამ უნდა შეასრულოს გაწევრიანების თაობაზე მოლაპარაკებების დასაწყებად. მათ შორისაა პოლარიზაციის დაძლევა, დეოლიგარქიზაცია, თავისუფალი და კონკურენტული არჩევნების უზრუნველყოფა და სხვა.

უკრაინასა და მოლდოვასთან მოლაპარაკებები 25 ივნისს გაიხსნა. საქართველოს ევროკავშირში ინტეგრაციის პროცესი კი შეჩერდა. საქართველოში ევროკავშირის ელჩმა პაველ ჰერჩინსკიმ საქართველოსთან დაკავშირებით გადაწყვეტილება ქვეყანაში „უცხოური გავლენის გამჭვირვალობის შესახებ“ კანონის მიღებითა და ხელისუფლების წარმომადგენლების ანტიდასავლური და ანტიევროპული რიტორიკით ახსნა.