თბილისი, 17 აგვისტო – Sputnik. დასავლეთ თურქეთში, ქალაქ იზმირში ტყის ხანძრის ჩაქრობაში ჩართულია სამი ათასი ადამიანი და 600-მდე ერთეული ტექნიკა, განაცხადა თურქეთის პრეზიდენტის ადმინისტრაციის კომუნიკაციების დეპარტამენტის ხელმძღვანელმა ფაჰრეთინ ალტუნმა.
მანამდე თურქეთის ლიდერის ოფისმა გაავრცელა ინფორმაცია, რომ იზმირში გაჩენილი ტყის ხანძრის კონტროლ ქვეშ მოქცევა ჯერ კიდევ ვერ მოხერხდა ძლიერი ქარის გამო.
„მთელი ქვეყნის მასშტაბით გაჩნდა 72 ხანძარი, საიდანაც 45 კონტროლ ქვეშ მოექცა. 27 შემთხვევაზე მუშაობა ჯერ კიდევ მიმდინარეობს. ჩვენი სახელმწიფო ყველაფერს აკეთებს ხანძრის შედეგად დაზარალებული მოქალაქეების დასახმარებლად. იზმირში ხანძრებზე ჰაერიდან და ხმელეთზე 596 ერთეული ტექნიკა მუშაობას და 2965 ადამიანი“, - დაწერა ალტთუნმა სოციალურ ქსელში.
იმავდროულად, ანორმალური სიცხის გამო თურქეთში არსებობს ტყის ხანძრების მაღალი რისკი მომდევნო სამი დღის განმავლობაში, განაცხადა სოფლის მეურნეობისა და სატყეო მეურნეობის მინისტრმა იბრაჰიმ იუმაკლიმ.
„მეტეოროლოგიური მონაცემებით, უახლოეს სამ დღეში ტყის ხანძრის გაჩენის მაღალი რისკია. საბრძოლო მზადყოფნაში ვართ“, - ციტირებს მის სიტყვებს გაზეთმა Hürriyet-მა.
მინისტრის თქმით, ქვეყნის მასშტაბით ტყის 47 ხანძრიდან 30 ლოკალიზებულია. ამასთან, როგორც გაზეთი განმარტავს, ქვეყნის დასავლეთით იზმირში გაჩენილმა ტყის ხანძარმა საცხოვრებელ უბნებს მიაღწია.
„იზმირში 16 სახლი დაიწვა, 87 სახლი და 44 ობიექტი ევაკუირებულია. ჯანდაცვის სამინისტროს ცნობით, ხანძრის შედეგად 78 ადამიანი დაშავდა“, - წერს გამოცემა.