თბილისი, 29 ივლისი - Sputnik. შავიზღვისპირა კურორტებზე 150-მდე შემოწმებული კვების ობიექტიდან ათში კრიტიკული შეუსაბამობები გამოვლინდა, ნათქვამია სურსათის ეროვნული სააგენტოს მიერ გავრცელებულ განცხადებაში.
უწყების ცნობით, აღნიშნული10 ბიზნესოპერატორი დაჯარიმდა და შეუსაბამობების აღმოფხვრამდე მათ საწარმოო პროცესი შეუჩერდათ.
როგორც განცხადებაშია აღნიშნული, ადგილობრივი მოსახლეობისა და დამსვენებლების ჯანმრთელობისა და უფლებების დაცვის მიზნით, საკურორტო ზონებში საზოგადოებრივი კვების ობიექტების კონტროლი აქტიურად მიმდინარეობს.
სურსათის ეროვნული სააგენტოს ინსპექტორები როტაციის პრინციპით კაფე-ბარებს, რესტორნებს, სასტუმროების კვების ბლოკებს, საცხობებსა და სწრაფი კვების ობიექტებს ტურისტებით დატვირთულ რეგიონებში - გურიასა და აჭარაში - ურეკში, შეკვეთილში, ბათუმში, ქობულეთში, გონიოში, კვარიათში, სარფსა და მაღალმთიან აჭარაში ამოწმებენ.
„შემოწმების დროს განსაკუთრებული ყურადღება ექცევა სურსათის ვადებს, ეტიკეტირებას, შენახვისა და რეალიზაციის პირობებს, სანიტარიულ-ჰიგიენურ ნორმებს, მიკვლევადობას“, - აღნიშნულია განცხადებში.
უწყების ცნობით, წინა წლებთან შედარებით, საზოგადოებრივი კვების ობიექტებში მდგომარეობა მკვეთრად არის გაუმჯობესებული, რასაც მოწმობს მომხმარებელთა გამოკითხვა და სურსათის ეროვნული სააგენტოს მიერ ჩატარებული ყოველწლიური სახელმწიფო კონტროლის შედეგები.
სააგენტო საზოგადოებრივი კვების ობიექტების კონტროლს ტურისტულ სეზონზე როტაციის პრინციპით 2018 წლიდან ახორციელებს.