თბილისი, 8 ივლისი — Sputnik. საქართველოში ოპოზიციურმა პარტია „ერთიანმა ნაციონალურმა მოძრაობამ“ და „სტრატეგია აღმაშენებელმა“ საპარლამენტო არჩევნებამდე ოთხი თვით ადრე ახალი პოლიტიკური პლატფორმა შექმნეს, რომელსაც საზოგადოების ცნობილი ადამიანები შეუერთდნენ.
„ნაცმოძრაობის" ყრილობის ფარგლებში ახალი პოლიტიკური პლატფორმის „ერთიანობა საქართველოს გადასარჩენად“ პრეზენტაცია პარტიის ახალმა თავმჯდომარემ, პარლამენტის წევრმა თინა ბოკუჩავამ გამართა.
„26 ოქტომბრის არჩევნები არის ჩვენი ქვეყნის გადარჩენის შანსი. ეს არის შანსი, დავიბრუნოთ ჩვენი ისტორიული არჩევანი“, - განაცხადა ბოკუჩავამ.
მისი თქმით, მოახლოებული არჩევნები არის შანსი, საზოგადოებამ თავი დაააღწიეს დაპირისპირებას და თავაწეული შევიდეს ევროკავშირში. მომავალი არჩევნები იქნება რეფერენდუმი, სადაც არჩევანი რუსეთსა და ევროპას შორის გაკეთდება.
„არჩევნების წინ ჩვენი ვალია, ვეძებოთ შეხების წერტილები, ის, თუ რა გვაერთიანებს, ახლა არ არის დანაწევრების, დაპირისპირების, ამბიციების ან ეგოების ჭიდილის დრო. ახლა საქართველოსთვის ერთიანობის დრო", - განაცხადა ბოკუჩავამ.
პოლიტიკურ პლატფორმას „ერთიანობა საქართველოს გადასარჩენად" შეუერთდა: პროფესორი, საქართველოს ყოფილი ელჩი გია ჯაფარიძე და ლიტერატურათმცოდნე, ისტორიკოსი ლაშა ბაქრაძე, „ნაცმოძრაობის" ახალგაზრდა წევრი ირაკლი პავლენიშვილი, სამოქალაქო აქტივისტები ლაშა დიაროვი და ანა მოსაშვილი..
გამოცდილი პოლიტიკოსებიდან გაერთიანებაში შევიდნენ - დეპუტატი, „სტრატეგია აღმაშენებლის" ლიდერი გიორგი ვაშაძე, დეპუტატები თამარ კორძაია და არმაზ ახვლედიანი, ასევე „ნაციონალური მოძრაობის" წევრი, მსჯავრდებული ექს-პრეზიდენტ მიხეილ სააკაშვილის პირადი წარმომადგენელი სოფო ჯაფარიძე.