თბილისი, 13 ივნისი — Sputnik. 1-ელი ივლისიდან საჯარო სკოლის ყველა მასწავლებელს ანაზღაურება 500 ლარით გაეზრდება, განაცხადა განათლებისა და მეცნიერების მინისტრმა გიორგი ამილახვარმა პარლამენტში „მინისტრის საათის" ფორმატში სიტყვით გამოსვლისას.
საქართველოში სკოლის პედაგოგები ოთხ კატეგორიად იყოფიან. პირველ საფეხურზე არიან პრაქტიკოსი პედაგოგები, მეორეზე – უფროსი პედაგოგები, მესამეზე – წამყვანი მასწავლებლები, მეოთხეზე – მენტორი მასწავლებლები. სტატუსიდან გამომდინარე ხელფასი 400-დან 1745 ლარამდე მერყეობს.
„ჩვენ დავაანონსეთ და ახლოვდება ის თარიღი, როდესაც მასწავლებელთა კორპუსისთვის ხელფასების უპრეცედენტო მატება მოხდება, ასეთი დიდი ნახტომი არ მომხდარა არა მხოლოდ ბოლო წლებში, არამედ თითქმის არასდროს. მასწავლებელთა სახელფასო ბიუჯეტი გაიზრდება დაახლოებით 35%-ით, ხოლო 2024 წლის 1-ელი ივლისიდან სრული დატვირთვის პირობებში და სტატუსის მიუხედავად, მასწავლებელთა ხელფასი საშუალოდ 500 ლარით გაიზრდება“, - განაცხადა ამილახვარმა.
მისი თქმით, ხელფასების მატება 53 ათას პედაგოგს შეეხება.
პარლამენტში სიტყვით გამოსვლისას მინისტრმა ზოგადი განათლების ეროვნული მიზნების ახალ დოკუმენტზეც ისაუბრა, რომელიც 2004 წლის შემდეგ არ შეცვლილა.
ახალ დოკუმენტში ყურადღება გამახვილებულია პატრიოტიზმის სულისკვეთებისა და ოჯახური იდეალების განმტკიცებაზე სკოლის მოსწავლეებში.
„ფართომასშტაბიან განხილვებითა და სასკოლო საზოგადოების წევრების აქტიური მონაწილეობით, 2004 წლიდან პირველად დამტკიცდა ზოგადი განათლების ეროვნული მიზნების ახალი დოკუმენტი, სადაც ძირითადი აქცენტი გაკეთდა პატრიოტიზმის, ეროვნული სულისკვეთების, ეროვნული იდენტობის, სახელმწიფოებრივი აზროვნებისა და ოჯახის ინსტიტუტის პატივისცემის ფორმირება-განმტკიცებაზე“, - განაცხადა ამილახვარმა.
გარდა ამისა, გიორგი ამილახვარის გადაწყვეტილებით, დაიწყო ზოგადსაგანმანათლებლო დაწესებულებების ავტონომიის გაძლიერება, რის გამოც სკოლებს მიეცათ მეტი აკადემიური თავისუფლება.
ამასთან, 20 სკოლაში დაიწყება პროფესიული საგანმანათლებლო პროგრამები და მე-12 კლასის მოსწავლეებს საშუალება ექნებათ სკოლაში დაეუფლონ სასურველ პროფესიას.
ქართულ სკოლებში სწავლა 12 წელი გრძელდება. საქართველოს სკოლებში სწავლადაყოფილია სამ საფეხურად: დაწყებითი საფეხური - პირველიდან მეექვსე კლასამდე, საბაზო - მეშვიდედან მეცხრე კლასამდე, საშუალო - მეათედან მე-12 კლასამდე. სკოლის ატესტატთან ერთად, ახალგაზრდები მიიღებენ პროფესიული განათლების მიღების დამადასტურებელ შესაბამის დოკუმენტსაც.