თბილისი, 21 მაისი — Sputnik. საქართველოს აქვს საჭირო შესაძლებლობები და მზად არის ქვეყნის ტერიტორიაზე ბრიტანული უნივერსიტეტები გახსნას - ასეთია ბრიტანული ორგანიზაცია Times Higher Education-ის (THE) სიღრმისეული კვლევის შედეგები, რომელიც ქვეყანაში მიმდინარე წლის იანვარ-მარტში ჩატარდა. ინფორმაციას უწყების პრესსამსახური ავრცელებს.
Times Higher Education-ის მიერ ჩატარებული კვლევის მიზანი იყო ბრიტანულ-ქართული ტრანსნაციონალური განათლების განვითარების შესაძლებლობებისა და გამოწვევების გამოვლენა, ასევე რეკომენდაციების შემუშავება ორ ქვეყანას შორის პარტნიორობის განვითარებისთვის.
კვლევის შედეგები და ქვეყნებს შორის თანამშრომლობა საქართველოს განათლების, მეცნიერებისა და ახალგაზრდობის მინისტრმა გიორგი ამილახვარმა ლონდონში ლანკასტერის სასახლეში მიმდინარე „განათლების მსოფლიო ფორუმის“ (The Education World Forum) ოფიციალური მიღების ფარგლებში დიდი ბრიტანეთის განათლების დეპარტამენტის მუდმივმოქმედ მდივან სიუზან აკლანდ-ჰუდთან განიხილა.
მინისტრი ასევე შეხვდა უმაღლესი განათლების საკითხებში დიდი ბრიტანეთის მთავრობის მრჩეველ სერ სტივ სმიტს, რომელთანაც ქართულ და ბრიტანულ უნივერსიტეტებს შორის თანამშრომლობის გაღრმავების პერსპექტივები განიხილა.
მინისტრმა ბრიტანული მხარისგან სრული მხარდაჭერა მიიღო, მათ საქართველოსთან მჭიდრო პარტნიორობის, ვიზიტის განხორციელებისა და ბაზარზე შემოსვლის მზაობა გამოთქვეს.
ოფიციალური მიღების დასასრულს გიორგი ამილახვარმა დიდი ბრიტანეთის განათლების დეპარტამენტის მუდმივმოქმედი მდივანი და განათლების საკითხებში მთავრობის მრჩეველი ქვეყნებს შორის პარტნიორობის გაძლიერების მიზნით საქართველოში დაპატიჟა.