თბილისი, 4 აპრილი – Sputnik. პოლიციამ თბილისსა და რეგიონებში ცეცხლსასროლი იარაღისა და საბრძოლო მასალის უკანონო შეძენა-შენახვა-ტარების ფაქტებზე ბოლო პერიოდში 13 ადამიანი დააკავა, ხოლო ერთი კი ამხილა, ნათქვამია შინაგან საქმეთა სამინისტროს მიერ გავრცელებულ ინფორმაციაში.
ბრალდებულები სამართალდამცველებმა სხვადასხვა დროს დააკავეს. მათ შორის ყველაზე უმცროსი 22 წლისაა, ხოლო უფროსი - 59 წლის.
დაკავებულებს შორის ორი უცხოეთის მოქალაქეა. ერთი მათგანი პოლიციამ თბილისში, ხოლო მეორე კი ბათუმში აიყვანა.
რაც შეეხება სხვა ბრალდებულებს, ხუთი მათგანის დაკავება საქართველოს დედაქალაქში მოხდა , ორი ბრალდებული კახეთში აიყვანეს, ორი ადამიანია დაკავებული რაჭა-ლეჩხუმისა და ქვემო სვანეთის პოლიციის თანამშრომლების მიერ, თითო-თითოა დაკავებული - შიდა ქართლსა და მცხეთა მთიანეთში. ცეცხლსასროლი იარაღისა და საბრძოლო მასალის უკანონო შეძენა-შენახვა-ტარების კიდევ ორი ფაქტი სამეგრელოშია გამოვლენილი, რაზეც ერთი ადამიანია დაკავებული, ხოლო მეორე - მხილებულია.
საქმეებზე გამოძიება საქართველოს სისხლის სამართლის კოდექსის 236-ე და 273-ე პრიმა მუხლებით მიმდინარეობს, რაც 3-დან 7 წლამდე ვადით თავისუფლების აღკვეთას ითვალისწინებს.
წყარო - შსს