თბილისი, 12 მარტი — Sputnik. საქართველოს ხელისუფლების სურვილია რუსეთთან ურთიერთობებში პრაგმატული პოლიტიკა გააგრძელოს, რომლის მიზანი ქვეყანაში მშვიდობის შენარჩუნებაა, განაცხადა საქართველოს პრემიერ-მინისტრმა ირაკლი კობახიძემ.
ორშაბათს, 11 მარტს, პრემიერმა ირაკლი კობახიძემ რუსეთთან ურთიერთობის საკითხებში პრემიერ-მინისტრის სპეცწარმომადგენლად გიორგი ქაჯაია დანიშნა, ზურაბ აბაშიძე კი, რომელიც აღნიშნულ პოსტს 2012 წლიდან იკავებდა, მთავრობის მეთაურის მრჩეველი გახდა.
„რაც შეეხება ამოცანებს, ისინი რჩება იგივე. თქვენ იცით როგორია ურთიერთობების რეჟიმი. ამ რეჟიმის ფარგლებში, რა თქმა უნდა, გვინდა გავაგრძელოთ ჩვენი პრაგმატული პოლიტიკა, რომლის მიზანია მშვიდობის შენარჩუნება ჩვენს ქვეყანაში. გვაქვს კონკრეტული ამოცანები, რომლებიც დაკავშირებულია ეკონომიკურ საქმიანობასთან“, - განაცხადა კობახიძემ.
ამასთან, მთავრობის მეთაურმა ზურაბ აბაშიძემ გაწეული საქმიანობისთვის მადლობა გადაუხადა.
„რაც შეეხება ზურაბ აბაშიძის საქმიანობას, იგი 12 წლის განმავლობაში ხელმძღვანელობდა იმ მიმართულებას, რასაც ჰქვია რუსეთთან ურთიერთობები და მე მას მადლობა გადავუხადე საჯაროდაც და პირადადაც ამ საქმიანობისთვის. მან 12 წლის თავზე თავად მიიღო ეს გადაწყვეტილება. აღნიშნული გადაწყვეტილება მას მიღებული ჰქონდა იქამდე, სანამ მე დავინიშნებოდი პრემიერ-მინისტრის თანამდებობაზე, შესაბამისად, ამ გადაწყვეტილებას ჩემს დანიშვნასთან არავითარი კავშირი არ ჰქონდა. ახლა კიდევ ერთხელ ვუხდი მადლობას იმ 12- წლიანი საქმიანობისთვის, რომელიც მან განახორციელა", - განაცხადა კობახიძემ.
საქართველოსა და რუსეთს შორის დიპლომატიური ურთიერთობები არ არსებობს. ის ქართულმა მხარემ 2008 წლის აგვისტოს ომის შემდეგ გაწყვიტა, როდესაც მოსკოვმა ცხინვალის რეგიონისა და აფხაზეთის დამოუკიდებლობა აღიარა.
მმართველმა პარტია „ქართული ოცნება - დემოკრატიულმა საქართველომ“, რომელიც ხელისუფლებაში 2012 წლის არჩევნების შედეგად მოვიდა, საგარეო პოლიტიკის ერთ-ერთ მთავარ პრიორიტეტად დაასახელა რუსეთთან ურთიერთობების ნორმალიზება, მაგრამ არა ქვეყნის ტერიტორიული მთლიანობის ხარჯზე.
საქართველოსა და რუსეთს შორის დიალოგი მხოლოდ ორი ფორმატით მიმდინარეობს - ზურაბ აბაშიძისა და გრიგორი კარასინის შეხვედრები და ჟენევის საერთაშორისო მოლაპარაკებები.