თბილისი, 29 იანვარი — Sputnik. ქვეყნის მასშტაბით გრიპის ვირუსით ინფიცირების მაჩვენებელი იკლებს, თებერვლიდან სიტუაცია შედარებით დასტაბილურდება, განაცხადა ინფექციონისტმა ალექსამდრე გოგინავამ.
ბოლო რამდენიმე კვირის განმავლობაში ქართველი ექიმები ვირუსული დაავადებების გავრცელების მკვეთრ ზრდაზე საუბრობენ. მათი თქმით, გადატვირთულია საავადმყოფოები, განსაკუთრებით ბავშვთა განყოფილებები. ჯანდაცვის მინისტრ ზურაბ აზარაშვილის განცხადებით, განსაკუთრებული არაფერი ხდება და ეს ვითარება დამახასიათებელია ვირუსული სეზონისთვის.
„ველოდებით, რომ მომავალი 2 კვირის განმავლობაში რესპირაციული ინფექციების შემთხვევები კიდევ უფრო დაიკლებს, თუმცა, ეს არ ნიშნავს, რომ ვირუსი საერთოდ გაქრება. მარტამდე შესაძლებელია გრიპის შემთხვევები დაფიქსირდეს და არა მარტო გრიპის, სხვა რესპირატორული ინფექციებისაც“, - განაცხადა გოგინავამ.
ინფექციონისტმა მოსახლეობას სიფრთხილისკენ და სპეციალისტების რეკომენდაციების დაცვისკენ მოუწოდა.
დაავადების დროს ძირითადი რეკომენდაციებია სხეულის ტემპერატურის კონტროლი, დიდი რაოდენობით სითხის მიღება და გართულებების შემთხვევაში ექიმისთვის მიმართვაა - ვირუსებთან ბრძოლის ძირითადი ხერხი კვლავ პირბადე და ვაქცინაციაა.
ამ დროისთვის საქართველოში გრიპის ვირუსი მძვინვარებს, რომელზეც ვირუსული დაავადებების შემთხვევების დაახლოებით 43% მოდის. ქვეყანაში, ძირითადად, А ტიპის ვირუსები ცირკულირებს - ვირუსის სიმპტომებად ექიმები მაღალ ტემპერატურას, თავისა და სახსრების ძლიერ ტკივილს, მკვეთრად გამოხატულ სისუსტეს ასახელებენ.
შემთხვევების უმეტესობა გამოწვეულია გრიპის ვირუსით, თუმცა საყურადღებოა რესპირატორულ-სინციტიალური ვირუსიც. ამ სეზონზე ასევე გვხვდება ადენოვირუსი და რინოვირუსი, რომლებიც ყოველთვის ცირკულირებენ ამ პერიოდში.