თბილისი, 18 იანვარი – Sputnik. ექს–პრემიერ გიორგი გახარიას პარტია „საქართველოსთვის“ კოალიციაშია და თანამშრომლობს „ერთიან ნაციონალურ მოძრაობასთან“, განაცხადა დედაქალაქის მერმა კახა კალაძემ ჟურნალისტებთან.
პარტიის „საქართველოსთვის“ ერთ–ერთმა ლიდერმა მიხეილ დაუშვილმა განაცხადა, რომ ისინი არ არიან კოალიციაში „ნაციონალურ მოძრაობასთან“. ამასთან, მან აღიარა, რომ გახარიას პარტიამ თვითმმართველობის არჩევნების შემდეგ გამოიყენა „ნაცმოძრაობა“ იმისთვის, რომ თავისი წარმომადგენლები საკრებულოებში თავმჯდომარეებად გაეყვანა და ეს ადგილები მმართველ პარტია „ქართული ოცნება – დემოკრატიულ საქართველოს“ არ დარჩენოდა.
„რეალურად ვიცით, რომ გახარია „ნაციონალურ მოძრაობასთან“ კოალიციაშია და მათთან თანამშრომლობს. ამის არაერთი მაგალითი შეგვიძლია მოვიყვანოთ, თუნდაც ის, რომ რეგიონებში კონკრეტული კოალიციები აქვს შექმნილი. ასე რომ, დღეს გახარია და „ნაციონალური მოძრაობა“ ერთია და შეიძლება მათ შორის განსხვავება ვერ იპოვოთ“, – განაცხადა კალაძემ.
მერის თქმით, პარტიის „საქართველოსთვის“ მთავარი საზრუნავია 2024 წლის ოქტომბერში საპარლამენტო არჩევნებზე 5–პროცენტიანი ბარიერის გადალახვა.
2024 წლის საპარლამენტო არჩევნებზე დეპუტატებს ახალი სისტემით პირველად აირჩევენ: არჩევნები იქნება მთლიანად პროპორციული და საარჩევნო უბნებზე ელექტრონული კენჭისყრით ჩატარდება. პარტიებისთვის გამსვლელი ბარიერი იქნება 5%.
2023 წლის წინასწარი გამოკითხვებით, ბარიერის გადალახვას ორიდან ხუთამდე პარტია შეძლებს. ლიდერობას ინარჩუნებს „ქართული ოცნება", „ნაცმოძრაობა" იკავებს მეორე პოზიციას და ყოველ გამოკითხვის დროს სხვაობა ამ პარტიებს შორის იზრდება „ოცნების" სასარგებლოდ.
იმავდროულად, ოპოზიციურ სპექტრში ამჟამად მიმდინარეობს ძალების გადანაწილება და პოლიტიკოსები ახალი პოლიტიკური ძალებისა და კოალიციების შექმნის საკითხზე აქტიურ კონსულტაციებს აწარმოებენ.