თბილისი, 18 ნოემბერი — Sputnik. რაჭის ტყეების დასაცავად თბილისში ეკოაქტივისტების მიერ გამართული აქცია პოლიციასთან დაპირისპირებაში გადაიზარდა და დაკავებებით დასრულდა მას შემდეგ, რაც მომიტინგეებმა გარემოს დაცვის სამინისტროსთან გზის გადაკეტვა და კარვების გაშლა სცადეს, იუწყება შინაგან საქმეთა სამინისტრო.
რაჭის უნიკალური ტყეების შენარჩუნების საკითხი აქტუალური მას შემდეგ გახდა, რაც ცნობილი გახდა რაიონში სამონადირეო მეურნეობის მოსაწყობად ლიცენზიის გაცემის შესახებ. გარემოს დაცვის სამინისტროში მანამდე განაცხადეს, რომ რაჭის ტყეებისთვის განსაკუთრებით დაცული ბუნებრივი ტერიტორიების სტატუსის მინიჭება იგეგმება და ამან შესაძლოა გამოიწვიოს სამონადირეო ლიცენზიის მოქმედების გადახედვა.
აქციაზე რამდენიმე ათეული ადამიანი შეიკრიბა, მათ შორის „რიონის ხეობის მცველები“, რომლებიც ცნობილი არიან პროტესტით „ნამახვანჰესის“ მშენებლობის წინააღმდეგ. მათი მთავარი მოთხოვნა იყო შეხვედრა გარემოს დაცვის სამინისტროს წარმომადგენლებთან და აღნიშნული საკითხის განხილვა.
აქციის ორგანიზატორებისა და მონაწილეებისადმი სამართალდამცველების არაერთი მოწოდების მიუხედავად, რომ დამორჩილებოდნენ შინაგან საქმეთა სამინისტროს წარმომადგენლების კანონიერ მოთხოვნას, არ გასცდენოდნენ შეკრების და გამოხატვის თავისუფლების კანონით დასაშვებ ფარგლებს, აქციის მონაწილეებმა არ გაითვალისწინეს პოლიციელების კანონიერი მოთხოვნა და დაარღვიეს საზოგადოებრივი წესრიგი.
13-ვე ადამიანი ადმინისტრაციული წესით წვრილმანი ხულიგნობისთვის და პოლიციის მოთხოვნებისადმი დაუმორჩილებლობისთვის არის დაკავებული.
შსს მოუწოდებს აქციის მონაწილეებს, დაემორჩილონ პოლიციის კანონიერ მოთხოვნას და არ გასცდნენ შეკრების და მანიფესტაციის კანონით დადგენილ ფარგლებს, რომელიც მცირერიცხოვანი აქციების მონაწილეებს გზის გადაკეტვას უკრძალავს.
წინასწარი მონაცემებით, დაკავებულთა შორის „რიონის ხეობის მცველების“ ლიდერი ვარლამ გოლეთიანია.
წყარო - შსს