თბილისი, 31 ოქტომბერი — Sputnik. რუსეთი 1 ნოემბრიდან ხორბალზე საექსპორტო გადასახადს შეამცირებს.
რუსეთმა 2021 წლის 2 ივნისიდან ხორბლის, სიმინდისა და ქერის ექსპორტზე მცოცავი ბეგარის მექანიზმი დააწესა, რომელიც მარცვლოვანთა დემპფერის მექანიზმის ფარგლებში მოქმედებს.
გადასახადი რუსეთიდან ხორბლის ექსპორტზე 1-8 ნოემბრის ჩათვლით პერიოდში ტონაზე 4.923,4 რუბლამდე შემცირდება, ქერის გატანა ნულოვანი რჩება, ხოლო სიმინდის ექსპორტი 1.618 რუბლამდე შემცირდება.
რუსეთიდან ხორბლის ექსპორტის გადასახადი 25-31 ოქტომბრის პერიოდში შეადგენს 1 ტონაზე 5.297,7 რუბლს, ქერის ექსპორტზე – ნულს, სიმინდზე – 2.218,1 რუბლს, იუწყება РИА Новости.
გადასახადებისგან მიღებული სახსრები ხორბლის, ჭვავის, სიმინდისა და საფურაჟე ქერის მწარმოებლების სუბსიდირების სახით რუსეთის ფედერაციის სუბიექტებს უბრუნდებათ. სუბსიდიები წარმოებული პროდუქციის მოცულობის შესაბამისად გადანაწილდება.
საქართველოს წელიწადში დაახლოებით 800 ტონა ფქვილი სჭირდება. ქვეყანაში მოხმარებული ხორბლის ფქვილის დიდი ნაწილი (78 პროცენტამდე) რუსეთიდან შემოდის. რუსეთი საქართველოში ხორბლისა და ფქვილის ყველაზე მსხვილ მომწოდებლად რჩება.
სტატისტიკის მიხედვით, მიმდინარე წლის იანვარ–აპრილში რუსეთიდან შემოიტანეს 13,9 მლნ დოლარის ღირებულების 44,1 ათას ტონაზე მეტი ხორბალი და მესლინი (2022 წლის იანვარ-აპრილის პერიოდის მაჩვენებელზე 17,2%-ით მეტი), ასევე 17,2 მლნ დოლარის ღირებულების 57,2 ათასი ტონა ხორბლის ფქვილი – 6,2%-ით მეტი, ვიდრე 2022 წლის ანალოგიურ პერიოდში.