თბილისი, 26 ოქტომბერი — Sputnik. მიუხედავად ოპოზიციის მხრიდან წინააღმდეგობისა, საქართველომ ყველაფერი გააკეთა, რათა კანდიდატის სტატუსის მისაღებად ევროკომისიის რეკომენდაციები შეესრულებინა, განაცხადა პრემიერ-მინისტრმა ირაკლი ღარიბაშვილმა ჟურნალისტებთან.
2022 წლის ივნისში ევროპულმა საბჭომ მიიღო გადაწყვეტილება, აღიაროს საქართველოს ევროპული პერსპექტივა და გამოთქვა მზადყოფნა, მიანიჭოს მას კანდიდატი ქვეყნის სტატუსი, როგორც კი შესრულდება 12 პირობა, რომელთა შორისაა დეოლიგარქიზაცია, დეპოლარიზაცია, მედიაგარემოს გაუმჯობესება, სასამართლო სისტემის სრული დამოუკიდებლობის უზრუნველყოფა და ა.შ.
„საქართველომ განახორციელა ძალზე გამჭვირვალე პროცესი. ჩვენ რეაგირება მოვახდინეთ 12-ვე რეკომენდაციაზე და რაც შესაძლებელი იყო, მაქსიმალურად მოკლე პერიოდში შევასრულეთ. ეს პროცესი იყო გამჭვირვალე და ღია“, – განაცხადა ღარიბაშვილმა.
პრემიერმა ამ მიმართულებით მთავარ პრობლემად ოპოზიციის მოქმედებები დაასახელა.
„სამწუხაროდ, უნდა ითქვას, რომ არსებობდა ძალიან ბევრი ხელშემშლელი გარემოება, ძალიან ბევრი საბოტაჟი თუ ბევრი ხელოვნური ბარიერი იქნა შექმნილი ოპოზიციის მხრიდან“, – განაცხადა ღარიბაშვილმა.
ამასთან, პრემიერმა აღნიშნა, რომ ოპტიმიზმით ელოდება ევროკომისიის დასკვნას და ევროპული საბჭოს გადაწყვეტილებას.
„არ მინდა გავუსწრო მოვლენებს და რაიმე დავაანონსო, მაგრამ ჩემი მოლოდინი არის შემდეგი: ვითვალისწინებ რა ჩვენ მიერ გაკეთებულ საქმეებს, ასევე მსოფლიოში შექმნილ გეოპოლიტიკურ ვითარებას, აგრეთვე შექმნილ პრეცედენტებს, როცა შარშან კანდიდატის სტატუსი მისცეს მოლდოვას, ბოსნია-ჰერცეგოვინას და უკრაინას, რომლებიც საკმაოდ ჩამორჩებოდნენ და დღესაც ჩამორჩებიან საქართველოს, დიდი ოპტიმიზმით ველოდები ჯერ 8 ნოემბრის გადაწყვეტილებას და შემდეგ უკვე დეკემბერში საბოლოო გადაწყვეტილებას“, – განაცხადა ღარიბაშვილმა.
მისი თქმით, ქართველი ხალხი ევროკავშირისგან შესაბამის შეფასებას ელოდება.
„როდესაც ქვეყანა მიიღებს სტატუსს, რა თქმა უნდა, ეს იქნება ხელისუფლების დამსახურება ქართველ ხალხთან ერთად, რადგანაც ჩვენ ვმოქმედებთ ქართველი ხალხის სახელით და ქართველი ხალხისთვის“, – განაცხადა ღარიბაშვილმა.
ევროკომისია საქართველოს მიერ 12 რეკომენდაციის შესრულების თაობაზე დასკვნას 8 ნოემბერს წარმოადგენს. ევროკომისიის დასკვნის საფუძველზე ევროპული საბჭო 14-15 დეკემბერს მიიღებს შემაჯამებელ გადაწყვეტილებას გაფართოების პოლიტიკის საკითხზე და საქართველოსთვის კანდიდატის სტატუსის მინიჭების თაობაზე.
ევროკომისიის მიერ ივნისში მიღებული შუალედური შეფასების თანახმად, საქართველომ 12-დან სრულად შეასრულა სამი რეკომენდაცია. ესენია: გენდერული თანასწორობა და ბრძოლა ქალთა წინააღმდეგ ძალადობასთან, სტრასბურგის გადაწყვეტილებების გათვალისწინება და დამოუკიდებელი სახალხო დამცველის არჩევა.
შვიდი რეკომენდაცია ნაწილობრივ არის შესრულებული. შეზღუდული პროგრესია მიღწეული კიდევ ერთ პუნქტში, ხოლო ერთ პუნქტთან - „მედიაპლურალიზმის და მედიის მფლობელების წინააღმდეგ სისხლის სამართლის პროცედურების" მიმართულებით პროგრესი საერთოდ არ არის.
როგორც „ქართული ოცნების" თავმჯდომარემ ირაკლი კობახიძემ ადრე განაცხადა, საქართველომ ყველაფერი გააკეთა ევროკავშირის პირობების შესასრულებლად და ელოდება კონკრეტიკას სამ რეკომენდაციაზე – დეოლიგარქიზაციის, სასამართლო რეფორმის და ორგანიზებულ დანაშაულთან ბრძოლის გაძლიერების შესახებ.