თბილისი, 19 ოქტომბერი – Sputnik. თუ საქართველოს პრეზიდენტი სალომე ზურაბიშვილი დანაშაულს ჩაიდენს და მას თანამდებობიდან იმპიჩმენტის გზით ვერ გადააყენებენ, სამართლებრივი რეაგირება სახელმწიფოს მეთაურის პოსტზე მისი უფლებამოსილების ამოწურვის შემდეგ განხორციელდება, განუცხადა ჟურნალისტებს პარლამენტის იურიდიულ საკითხთა კომიტეტის თავმჯდომარემ ანრი ოხანაშვილმა.
მანამდე პარლამენტის თავმჯდომარემ შალვა პაპუაშვილმა განაცხადა, რომ საქართველოს პრეზიდენტი თავს კანონის მიღმა დააყენებს, თუ მთავრობის თანხმობის გარეშე გააგრძელებს საზღვარგარეთ ვიზიტებს და ამით დაარღვევს კონსტიტუციას. საზოგადოებრივი მოძრაობა „ხალხის ძალის“ ერთ-ერთი ლიდერის, დეპუტატ გურამ მაჭარაშვილის განცხადებით კი, თუ პრეზიდენტი საკონსტიტუციო სასამართლოს გადაწყვეტილებას არ დაემორჩილება, მას სისხლისსამართლებრივი პასუხისმგებლობა დაეკისრება.
„რაც შეეხება შესაძლო დანაშაულის ჩადენას, იმ შემთხვევაში, თუ დანაშაული იქნება ჩადენილი, დაიწყება შესაბამისი სამართლებრივი წარმოება, თუმცა, იმუნიტეტის პირობებში, იქამდე, ვიდრე კონკრეტული პირი თანამდებობაზეა, ვერ მოხდება სამართლებრივი გადაწყვეტილების მიღება“, – განაცხადა ოხანაშვილმა.
მისი თქმით, ზურაბიშვილი განახორციელებს უცხოურ ვიზიტს საკუთარი სახსრებით თუ სახელმწიფო ბიუჯეტის – ეს ორი სხვადასხვა სიტუაციაა.
„უკანონო ვიზიტის ბიუჯეტით განხორციელება იქნება პირდაპირ დანაშაულის ნიშნების შემცველი, ხოლო თუ პირადი სახსრებით განახორციელებს, ეს იქნება საკონსტიტუციო სასამართლოს გადაწყვეტილების და კონსტიტუციის უხეში დარღვევა“, – განაცხადა ოხანაშვილმა.
მისი თქმით, ის ფაქტი, რომ ზურაბიშვილმა სამი ვიზიტი საკუთარი სახსრებით განახორციელა, მათ კანონიერს არ ხდის.
„პირადი სახსრებით დაფინანსება ლეგიტიმაციას ვერ სძენს უკანონობას, ამით ვერ აკანონებს უკანონობას“, – აღნიშნა ოხანაშვილმა.
რაც შეეხება კონკრეტულ რეაგირებას, ამას, ოხანაშვილის თქმით, პროკურატურა წყვეტს.
18 ოქტომბერს მმართველმა პარტიამ სალომე ზურაბიშვილის იმპიჩმენტის პროცედურის მხარდასაჭერად ხმების საკმარისი რაოდენობა ვერ შეაგროვა მიუხედავად საკონსტიტუციო სასამართლოს გადაწყვეტილებისა, რომ მან საქართველოს კონსტიტუცია დაარღვია. საქართველოს პრეზიდენტის თანამდებობიდან გადაყენებას 100-ის ნაცვლად მხოლოდ 86-მა დეპუტატმა დაუჭირა მხარი.
ზურაბიშვილმა, რომელიც სხდომას ესწრებოდა, უარი თქვა დეპუტატების კითხვებზე პასუხის გაცემაზე. მეტიც, მას არ გაუცია ცალსახა პასუხი კითხვაზე, როგორი იქნება მისი შემდგომი მოქმედებები.
რა იქნება შემდეგ
პარლამენტში სალომე ზურაბიშვილის იმპიჩმენტი ჩავარდა, შესაბამისად, იგი დარჩა საქართველოს პრეზიდენტად და შეინარჩუნა კონსტიტუციით გათვალისწინებული ყველა უფლებამოსილება, მათ შორის, მოქალაქეობის მინიჭების შესახებ საბოლოო გადაწყვეტილება, ვეტოს უფლება და შეწყალების უფლება.
ზურაბიშვილი თანამდებობიდან გადადგომას არ გეგმავს, ხოლო იმპიჩმენტის ჩავარდნის შემდეგ მან დუმილის უფლება დაიტოვა.
თუმცა, პრეზიდენტს რიგ შემთხვევებში მთავრობასთან ერთად მოქმედება და შემდეგი წლის დასაწყისში დეპუტატების წინაშე პარლამენტში ყოველწლიური ანგარიშით გამოსვლაც მოუწევს.
სალომე ზურაბიშვილი პირდაპირი არჩევნებით არჩეული საქართველოს ბოლო პრეზიდენტია, რომელსაც უფლებამოსილების ვადა 2024 წლის შემოდგომაზე ეწურება.