თბილისი, 18 ოქტომბერი − Sputnik. მოვუწოდებ მუსლიმურ ქვეყნებს, დაუწესონ ისრაელს ემბარგო ნავთობზე და გააძევონ ისრაელის ელჩები თავიანთი ტერიტორიებიდან, განაცხადა ირანის საგარეო საქმეთა მინისტრმა ჰოსეინ ამირაბდოლაჰიანმა ისლამური თანამშრომლობის ორგანიზაციის წევრი ქვეყნების შეხვედრაზე, რომელიც საუდის არაბეთში იმართება.
ირანელი მინისტრის ეს მოწოდება ღაზაში ალ-აჰსის საავადმყოფოზე მიტანილი შეტევითაა განპირობებული, რა დროსაც, არსებული ცნობით, 800 ადამიანი დაიღუპა, და რაშიც ამირაბდოლაჰიანმა ისრაელი დაადანაშაულა.
„ჩვენ ველოდებით, რომ ისლამური ქვეყნები, რომლებსაც დიპლომატიური ურთიერთობები აქვთ სიონისტურ რეჟიმთან, დაუყოვნებლივ გაწყვეტენ მასთან ურთიერთობებს და გააძევებენ ისრაელის ელჩებს თავიანთი ქვეყნებიდან. მეორე: ისრაელში ნავთობის ექსპორტი და ისრაელსა და ნებისმიერ მუსლიმურ სახელმწიფოს შორის არსებული ნებისმიერი პროექტი დაუყოვნებლივ უნდა შეჩერდეს“, − აღნიშნა ირანის მთავარმა დიპლომატმა.
ამ დროისათვის არც ირანს და არც მუსლიმური სამყაროს რომელიმე სხვა ქვეყანას ამ მოწოდებაზე კომენტარი არ გაუკეთებია.
აღსანიშნავია, რომ ისრაელი ნავთობის მცირე იმპორტიორია და დიდწილად ახლო აღმოსავლეთის ქვეყნებიდან, მათ შორის არაბთა გაერთიანებული საამიროებიდან (UAE) და საუდის არაბეთიდან მიწოდებებს ეყრდნობა. ამ ქვეყნების ხელისუფლებებმა არაერთხელ გააკრიტიკეს იერუსალიმი ღაზის სექტორზე სარაკეტო თავდასხმების გამო, მაგრამ აქამდე ნავთობის მიწოდება სრულად არასდროს შეუწყვეტიათ.
როგორც ექსპერტები ამბობენ, იმ შემთხვევაში, თუ არაბეთის ნავთობექსპორტიორმა ქვეყნებმა მართლაც დაუწესეს სანქციები ისრაელს, ისინი მხოლოდ მასზე კი არა, არამედ ყველა მის მხარდამჭერ ქვეყანაზე გავრცელდება − როგორც ეს მანამდე, 1974 წელს მოხდა.
ამასთან სპეციალისტები ხაზს უსვამენ, რომ წინა ემბარგო არაეფექტური გამოდგა, ვინაიდან არაბულმა ქვეყნებმა ვერანაირი რეალური პოლიტიკური დათმობა ვერ მიიღეს და ნავთობის მიწოდების შეზღუდვები ერთ წელზე ნაკლებ ხანს გაგრძელდა.
წყარო: Times of Israel