თბილისი, 13 ოქტომბერი − Sputnik. ვანო სარაჯიშვილის სახელობის თბილისის სახელმწიფო კონსერვატორიამ საქართველოს კულტურის, სპორტისა და ახალგაზრდობის მინისტრის თეა წულუკიანის წინააღმდეგ თბილისის საქალაქო სასამართლოში შეტანილი სარჩელი უკან გაიწვია.
კონსერვატორიის სარჩელი მოითხოვდა სამინისტროსთვის ისეთი მოქმედებების აკრძალვას, რომლებიც უკავშირდება კონსერვატორიის რექტორის არჩევნებს. მაგრამ კონსერვატორიის შუამდგომლობა რექტორის არჩევნების თაობაზე მინისტრის ბრძანების გაუქმების შესახებ სასამართლომ არ დააკმაყოფილა.
როგორც კულტურის სამინისტროში აღნიშნეს, კონსერვატორიის რექტორის მოვალეობის შემსრულებელმა თამარ ბულიამ (თავად რექტორი ნანა შარიქაძე გრძელვადიანი მივლინებით საზღვარგარეთ გაემგზავრა) სარჩელის გაწვევა მას შემდეგ გადაწყვიტა, რაც სასამართლომ მინისტრ წულუკიანის წინააღმდეგ შუამდგომლობა არ დააკმაყოფილა.
თბილისის ვანო სარაჯიშვილის სახელობის სახელმწიფო კონსერვატორიაში რექტორის არჩევის პროცედურა მიმდინარე წლის სექტემბერში მინისტრ თეა წულუკიანის ბრძანებით გაუქმდა. რექტორს კონსერვატორიის საბჭო ირჩევდა, რომელიც შედგება შვიდი წევრისგან.
კონსერვატორიის წარმომადგენლებსა და კულტურის სამინისტროს შორის მოლაპარაკებების შემდეგ კონსერვატორიას, კანონის შესაბამისად, არჩევნების პროცედურის მოსამზადებლად დრო მიეცა.
ამგვარად, მინისტრის 25 სექტემბრის ბრძანება ძალაში რჩება და კონსერვატორიის რექტორის არჩევნები არ ჩატარდება, თუ კონსერვატორია შესაბამის იურიდიულ დოკუმენტაციას კანონთან შესაბამისობაში არ მოიყვანს.