თბილისი, 7 ოქტომბერი — Sputnik. სახელმწიფოს მიერ გადადგმული ნაბიჯები ადრეულ ასაკში ქორწინებისა და ფემიციდის აღმოსაფხვრელად არასაკმარისია, საჭიროა გაძლიერდეს მუშაობა მსგავსი დანაშაულის აღსაკვეთად, განაცხადა სახალხო დამცველმა ლევან იოსელიანმა საგარეჯოს მუნიციპალიტეტში 14 წლის გოგონას მკვლელობის ფაქტის კომენტირებისას.
საზარელი შემთხვევა 6 ოქტომბერს მოხდა.
მოზარდის მკვლელობაში მისი „ქმარია“ ბრალდებული. მედიის ინფორმაციით, მან გოგონა ცეცხლსასროლი იარაღით მოკლა, საზარელი შემთხვევა მამაკაცის ბიძაშვილის ქორწილში მოხდა. მომხდარ ფაქტზე გამოძიება სსკ-ის 11 პრიმა 109-ე მუხლით მიმდინარეობს, რაც ოჯახის წევრის მიმართ დამამძიმებელ გარემოებაში განზრახ მკვლელობას გულისხმობს.
„შემაძრწუნებელია 14 წლის გოგოს მკვლელობის უმძიმესი ფაქტი და საგანგაშოა გავრცელებული ინფორმაცია ამ ტრაგიკულ ფაქტამდე მისი თავისუფლების უკანონო აღკვეთისა და იძულებით ბავშვობის ასაკში ქორწინების შესახებ“, - განაცხადა იოსელიანმა.
იოსელიანის თქმით, ქალთა მიმართ დისკრიმინაციის აღმოფხვრის კომიტეტის მოწოდების მიუხედავად, სახელმწიფოს არ გაუძლიერებია მუშაობა გენდერული ძალადობის წინააღმდეგ ისეთ რეგიონებში, სადაც გენდერული ნორმები და სტერეოტიპები განსაკუთრებით ძლიერად მოქმედებს.
„სახელმწიფოს მიერ გადადგმული ნაბიჯები ადრეულ ასაკში ქორწინებისა და ფემიციდის შემთხვევებზე არასაკმარისია და საჭიროებს სისტემურ და კოორდინირებულ მუშაობას როგორც ცენტრალურ, ასევე ადგილობრივ დონეზე“, - განაცხადა იოსელიანმა.
მისი განცხადებით, ქალთა მკვლელობის, მკვლელობის მცდელობის და ბავშვობის ასაკში ქორწინების საქმეებზე უნდა მოხდეს ყველა შესაბამისი უწყების დროული და ეფექტური ჩართულობა და რეაგირება, მათ შორის მკაცრი პოლიტიკის გატარება დანაშაულის შეუტყობინებლობის შემთხვევებზე.