თბილისი, 6 ოქტომბერი — Sputnik. ევროპული საბჭოს ხელმძღვანელი შარლ მიშელი და ევროკომისიის პრეზიდენტი ურსულა ფონ დერ ლაიენი ერთმანეთს უკრაინისა და ევროკავშირში ძალაუფლების გამო დაუპირისპირდნენ, ნათქვამია გერმანული გამოცემა Spiegel-ის ინფორმაციაში.
როგორც გამოცემა წერს, ევროკომისიას ნეგატიური რეაქცია ჰქონდა შარლ მიშელის ინტერვიუზე, რომელიც მანამდე გამოაქვეყნა Spiegel-მა.
„შარლ მიშელმა ევროკომისიის პრეზიდენტი ურსულა ფონ დერ ლაიენი საგარეო პოლიტიკური უფლებამოსილების გადაჭარბებაში დაადანაშაულა. კომისიის პრეს-მდივანმა არიანა პოდესტამ უარყო ეს ბრალდებები“, — წერს გამოცემა.
როგორც პოდესტამ აღნიშნა პრესკონფერენციაზე, ევროპული საბჭოს ხელძღვანელის განცხადებები, რომელთან ინტერვიუც რამდენიმე საათით ადრე გამოაქვეყნა SPIEGEL-მა, ნაწილობრივ არაზუსტია.
ინტერვიუში შარლ მიშელი ურსულა ფონ დერ ლაიენის საგარეო პოლიტიკურ ინიციატივებს აკრიტიკებდა და ასევე ეხებოდა ევროკავშირში როლების განაწილების საკითხსაც. მისი თქმით, ის მნიშვნელოვან პოლიტიკურ როლს ასრულებს ევროპული საბჭოს პრეზიდენტის რანგში, რომელიც „იღებს კიდეც გადაწყვეტილებებს სტრატეგიული მიმართულების შესახებ“.
ურსულა ფონ დერ ლაიენის მხრიდან უფლებამოსილების გადაჭარბების მაგალითად მიშელმა ტუნისთან მიგრაციის შესახებ შეთანხმება დაასახელა, რომელსაც, მისი თქმით, ევროკომისიის ხელმძღვანელმა მოაწერა ხელი, თუმცა ევროკავშირის საბჭო „განზე დარჩა“.
ამასთან გამოცემა წერს, რომ შარლ მიშელი, რომელიც ფონ დერ ლაიენს აკრიტიკებს, „თავად აჭარბებს საკუთარ უფლებამოსილებებს, როდესაც უკრაინას ევროკავშირში 2030 წლისთვის გაწევრიანების პერსპექტივას აღუთქვამს“.
წყარო: Spiegel