მოლოდინს გადააჭარბა: ფიროსმანის გამოფენას დანიაში 250 ათასზე მეტი ადამიანი ეწვია

თბილისი, 26 აგვისტო – Sputnik. დანიის თანამედროვე ხელოვნების მუზეუმ „ლუიზიანაში“ (Louisiana) დიდი ქართველი მხატვრის ნიკო ფიროსმანის ნამუშევრების გამოფენას 260 ათასი ვიზიტორი ეწვია.

„ლუიზიანა" მდებარეობს ჰუმლებეკში, კოპენჰაგენიდან ჩრდილოეთით 35 კმ-ში. 1958 წელს გახსნილ მუზეუმს ყოველწლიურად დაახლოებით 600 ათასი ადამიანი სტუმრობს. ეს არის დანიის ერთ-ერთი ყველაზე პოპულარული მუზეუმი, რომელიც ყველაზე პოპულარული ღირსშესანიშნაობების ტოპ-ათეულში შედის.

ქართველი გენიოსი პრიმიტივისტის ნამუშევრებს თანამედროვე ხელოვნების დანიის მუზეუმში 4 მაისიდან 20 აგვისტომდე ეცნობოდნენ. ახლა კი ფიროსმანის ნახატები შვეიცარიის ქალაქ რიენში, ბეილერის ფონდის მუზეუმში გადაინაცვლებს, სადაც 17 სექტემბრიდან 2024 წლის 28 იანვრამდე იქნება გამოფენილი.

სამთვიანი ექსპოზიციის შედეგებს მუზეუმის დირექტორი კულტურის სამინისტროსთვის გამოგზავნილ ოფიციალური წერილით ეხმიანება.

წერილში ასევე აღნიშნულია, რომ გამოფენას ეწვია 260 ათასი ადამიანი ეწვია, რაც მათ დიდ მოლოდინს გადააჭარბა.

მსოფლიოში აღიარებული მხატვრის 50-მდე ორიგინალური ნამუშევარი კოპენჰაგენში სპეციალური პირდაპირი რეისით ჩაიტანეს. გამოფენაზე გაიგზავნა მხოლოდ ის ნამუშევრები, რომლებიც ტრანსპორტირებას ექვემდებარებოდა, აღნიშნეს კულტურის სამინისტროში.

ბეილერის ფონდის მუზეუმში გამოფენის შემდეგ ტილოები საქართველოს დაუბრუნდება.

ნიკო ფიროსმანი (1862-1918) XX საუკუნის უდიდესი ქართველი მხატვარია. იგი სიღარიბეში ცხოვრობდა და სიღარიბეშივე გარდაიცვალა. გარდაცვალების შემდეგ კი მსოფლიომ აღიარა როგორც უდიდესი მხატვარი. მხატვრის სურათების უმრავლესობა, 146 ტილო დაცულია თბილისში, საქართველოს ხელოვნების სახელმწიფო მუზეუმში.