თბილისი, 23 აგვისტო — Sputnik. საქართველოს ჯანდაცვის სამინისტრომ პირველი ტიპის შაქრიანი დიაბეტის მქონე ბავშვებისთვის გლუკოზის უწყვეტი მონიტორინგის განახლებული სისტემებისა და სენსორების (CGM) უფასოდ მისაღებად რეგისტრაცია დაიწყო, ნათქვამია უწყების პრეს-სამსახურის განცხადებაში.
გლუკოზის უწყვეტი მონიტორინგი CGM – დიაბეტის ეფექტური მართვისთვის განკუთვნილი ტექნოლოგიაა, რომელიც გლუკოზის დონის ცვლილებებს სადღეღამისო რეჟიმში აკონტროლებს. ასეთი მოწყობილობა ძალზე მნიშვნელოვანია დიაბეტის მქონე ბავშვებისთვის, რადგან მათთვის სიცოცხლის გადარჩენა შეუძლია. საქართველოში CGM 1,3 ათასზე მეტ ბავშვს სჭირდება.
ჯანდაცვის სამინისტრო პაციენტებს CGM-ის გამოსაყენებლად სმარტფონებსაც გადასცემს. მათი მიღება შეუძლიათ სოციალურად დაუცველი ოჯახების ბავშვებს, რომელთა ოჯახის სარეიტინგო ქულა არ აღემატება 120.000-ს, ასევე ოჯახებს, სადაც შაქრიანი დიაბეტით დაავადებულია 18 წლამდე ასაკის ორი ან მეტი ბენეფიციარი.
პირველი ტიპის დიაბეტის მქონე ბავშვებს Medtronic-ის უახლესი, მე-4 თაობის მოწყობილობა გადაეცემა. CGM სისტემა სისხლში გლუკოზის დონეს ყოველ 5 წუთში ზომავს და პაციენტის მობილურ პროგრამაში ასახავს. საშიში მაჩვენებლის წარმოქმნის შემთხვევაში სისტემა განგაშის სიგნალს რთავს, რაც პაციენტისთვის დახმარების დროულად აღმოჩენის შესაძლებლობას იძლევა.
Medtronic CGM სისტემებს ყველა ასაკის პაციენტებისთვის აწარმოებს. ეს სისტემა წამიერად ასახავს და დიდი ხნის განმავლობაში ინახავს მონაცემებს გლუკოზის დონის შესახებ.
რაც შეეხება Guardian 4-ს, ის შესწავლილია და დამტკიცებულია 7 წელს ზემოთ ასაკის პაციენტებისთვის. კომპანიის სპეციალისტებს მოწყობილობის 7 წლამდე ასაკის ბავშვებისთვის გამოყენებაზე რეკომენდაციები ჯერ არ გაუციათ, შესაბამისად, ის გამოყენებული იქნება 7-18 წლის პირებისთვის.
შვიდ წლამდე ბავშვებისთვის გრძელდება Guardian 3-ის მოწყობილობის გაცემა. ჯანდაცვის სამინისტრო განაგრძობს მუშაობას კომპანიის ექსპერტებთან პაციენტების ასაკის შემცირებასთან დაკავშირებით და გასცემს მოწყობილობას, როგორც კი მწარმოებელი კომპანიისგან ნებართვას მიიღებს.
გლუკოზის უწყვეტი მონიტორინგის სისტემის მისაღებად მსურველებმა ჯანდაცვის ეროვნული სააგენტოების ოფისებში უნდა გაიარონ რეგისტრაცია.
ჯანდაცვის სამინისტრომ და მომწოდებელმა კომპანიამ ბავშვთა 30 ენდოკრინოლოგსა და მედდას მთელ ქვეყანაში უკვე მიაწოდეს დეტალური ინფორმაცია სისტემის შესახებ.
თავის მხრივ, მომზადებული პერსონალი შეასწავლის ბენეფიციარსა და მის მეურვეს, როგორ გამოიყენონ კომპლექტი და დამოუკიდებლად დაიმაგრონ გადამცემი.