თბილისი, 15 აგვისტო – Sputnik. სამხედრო სავალდებულო სამსახურში საშემოდგომო გაწვევა დაიწყება 21 აგვისტოს და 27 დეკემბრამდე გაგრძელდება, საქართველოს მთავრობის შესაბამისი დადგენილება საკანონმდებლო მაცნის ვებგვერდზე გამოქვეყნდა.
სამხედრო სავალდებულო სამსახურში 18-დან 27 წლამდე ასაკის 3100-ზე მეტ პირს გაიწვევენ. აქედან თავდაცვის ძალებში გასაწვევ მოქალაქეთა მაქსიმალური რაოდენობა განისაზღვრა 1400-ით. ეს რიცხვი ბოლო სამი წლის განმავლობაში არ შეცვლილა.
პენიტენციურ სამსახურში გაიწვევენ 570 წვევამდელს, საქართველოს შინაგან საქმეთა სამინისტროში გასაწვევ მოქალაქეთა მაქსიმალური რაოდენობა განისაზღვრა 949-ით, სახელმწიფო დაცვის სპეციალურ სამსახურში გასაწვევ მოქალაქეთა მაქსიმალური რაოდენობა განისაზღვრა 225-ით.
სამსახურის ვადა 12 თვეს მოიცავს.
წვევამდელთა ეროვნულ სამხედრო სამსახური არ შეეხება შემდეგი კატეგორიის პირებს:
პირი, რომელიც ჯანმრთელობის მდგომარეობის გამო ეროვნული სამხედრო სამსახურისთვის უვარგისად იქნა ცნობილი;
პირი, რომელსაც გავლილი აქვთ ალტერნატიული სამხედრო სამსახური სხვა ქვეყნის შეიარაღებულ ძალებში;
მძიმე და განსაკუთრებით მძიმე დანაშაულის ჩადენისთვის ნასამართლევი პირი;
შეზღუდული შესაძლებლობის მქონე პირი;
ერთადერთი ვაჟი ოჯახში, რომლის ერთი წევრი მაინც დაიღუპა საქართველოს ტერიტორიული მთლიანობისათვის ბრძოლებში ან სამხედრო სამსახურის გავლისას;
პარლამენტის წევრები.
გარდა ამისა, მთავრობა უფლებამოსილია სამხედრო სამსახურში გაწვევისაგან გაათავისუფლოს განსაკუთრებული ნიჭით დაჯილდოებული წვევამდელი.
ამასთან, სავალდებულო სამხედრო სამსახურში გაწვევის გადავადებისთვის მიზეზების ჩამონათვალიდან ამოიღეს სასულიერო პირის სტატუსის ქონა და სასულიერო სასწავლებელში სწავლა, მაგრამ ჩამონათვალს დაემატა სხვა მიზეზები. ამასთან, ყველა სასულიერო პირი ალტერნატიულ სამსახურს გაივლის.
ახალი ვერსიით, გადავადების მიზეზი გახდება:
მარტოხელა მამის სტატუსი;
არჩევით სახელმწიფო ორგანოს ან ადგილობრივი ხელისუფლების ორგანოს წევრობა;
თავდაცვის ან შინაგან საქმეთა სამინისტროების სისტემებში მუშაობა;
მუშაობა სპეციალურ პენიტენციურ სამსახურში;
მუშაობა უსაფრთხოების სამსახურში, დაზვერვაში ან დაცვის სპეციალურ სამსახურში;
ნასამართლეობა ნაკლებად მძიმე დანაშაულისთვის სასჯელის ვადის პერიოდში;
სარეზერვო სამსახურის პროგრამაში მონაწილეობა.
წყარო - საკანონმდებლო მაცნე