ბორელი: რუსეთი ქვეყნებს თავის მარცვლეულზე დამოკიდებულს ხდის

თბილისი, 3 აგვისტო — Sputnik. რუსეთი იაფ მარცვლეულს იმიტომ გთავაზობთ, რომ ეკონომიკური მოწყვლადობისა და გლობალური სასურსათო არასტაბილურობის გაღრმავებით მასზე დამოკიდებული გაგხადოთ, გააფრთხილა განვითარებადი ქვეყნების ხელისუფლებები ევროკავშირმა.

ამის შესახებ იუწყება სააგენტო Reuters ევროკავშირის საგარეო პოლიტიკის ხელმძღვანელის ჟოზეპ ბორელის წერილზე დაყრდნობით.

ბორელმა ორშაბათს წერილობით მიმართა განვითარებად და G20-ის ქვეყნებს და მოუწოდა მათ, ისაუბრონ „მკაფიო და ერთიანი ხმით“, რათა შავი ზღვის ინიციატივის მარცვლეულის გარიგების განახლებისკენ უბიძგონ მოსკოვს.

ჟოზეპ ბორელის თქმით, იმ დროს, როდესაც მსოფლიოს მარცვლეულის მიწოდებებში შეფერხებასთან და ფასების ზრდასთან აქვს საქმე, რუსეთი მოწყვლად ქვეყნებს ორმხრივი წინადადებებით მიმართავს მარცვლეულის დაბალ ფასად მიწოდების შესახებ და ისე წარმოაჩენს, თითქოს პრობლემას აგვარებს.

რუსეთის პრეზიდენტმა ვლადიმირ პუტინმა გასულ კვირაში აფრიკის ქვეყნების ლიდერებს განუცხადა, რომ რუსეთი მზადაა ჩაანაცვლოს უკრაინული მარცვლეულის ექსპორტი აფრიკაში როგორც კომერციულ, ისე დახმარების საფუძველზე, რათა მოსკოვმა თავისი გადამწყვეტი როლი შეასრულოს გლობალურ სასურსათო უსაფრთხოებაში.

რუსეთი შავი ზღვის მარცვლეულის ინიციატივიდან, რომელსაც 2022 წლის 22 ივლისს მოაწერეს ხელი რუსეთის, თურქეთის, უკრაინისა და გაეროს წარმომადგენლებმა, მიმდინარე წლის 17 ივლისს გავიდა. აღნიშნული ინიციატივა უკრაინული მარცვლეულის, სურსათისა და სასუქის შავი ზღვის გავლით ექსპორტს გულისხმობს.

ხელშეკრულებიდან გასვლის მიზეზად კრემლმა შეთანხმების მეორე ნაწილის, რუსეთი-გაეროს მემორანდუმის შეუსრულებლობა დაასახელა, რომელიც რუსული სურსათისა და სასუქების ექსპორტის განბლოკვას, „როსსელხოზბანკის“ SWIFT-თან ხელახლა დაკავშირებას, სასოფლო-სამეურნეო ტექნიკის, სათადარიგო ნაწილებისა და სერვისების მიწოდების განახლებას, ტოლიატი-ოდესის ამიაკის მილსადენის მუშაობის აღდგენასა და რიგ სხვა ღონისძიებებს ითვალისწინებდა.

რუსეთის პრეზიდენტ ვლადიმირ პუტინის თქმით, რუსეთი განიხილავს გარიგებაში დაბრუნების შესაძლებლობას, თუ მასში მონაწილეობის ყველა პრინციპი განხორციელდება.