თბილისი, 13 ივლისი — Sputnik. შავი ზღვის დინებების რუკის მიხედვით რაიმე ისეთი ვარიანტი, რომ საქართველოში ბაქტერიოლოგიურად დაბინძურდეს ან სხვა ნივთიერებებით დაბინძურებული წყალი შემოვიდეს და გავლენა მოახდინოს ტურისტულ სეზონზე, არის აბსოლუტური აბსურდი, განაცხადა გარემოს ეროვნული სააგენტოს წყლის ბიომრავალფეროვნების დეპარტამენტის წარმომადგენელმა რამაზ მიქელაძემ „პირველი არხის" ეთერში.
შავ ზღვაში წყლის უსაფრთხოების საკითხი აქტუალური განსაკუთრებით უკრაინაში კახოვკის ჰესის აფეთქების შემდეგ გახდა. გავრცელებული ინფორმაციით, ამ მიზეზით შავი ზღვის მარილიანობა საგრძნობლად შემცირდა. ექსპერტები ამას ზღვაში დიდი რაოდენობით მტკნარი წყლის მოხვედრით ხსნიან.
მიქელაძის განმარტებით, შავი ზღვის სანაპიროზე ამ ეტაპზე არსებული მახასიათებლებით რამე განსაკუთრებული მოვლენა არ ვლინდება, რომელიც შეიძლება საშიშროებას ქმნიდეს როგორც ადამიანისთვის, ასევე ბიოლოგიური გარემოსთვის.
„კახოვკიდან გამომდინარე აჟიოტაჟმა გამოიწვია, რომ კვლევებს ყოველ მეათე დღეს ვატარებთ. არის ადგილები, სადაც საბანაო-საცურაო უბნები არ არის, მაგრამ ჩვენ იქაც ვიღებთ სინჯებს ბაქტერიოლოგიური შესწავლის მიზნით", – განაცხადა მიქელაძემ.
მისი თქმით, არსებობს მცდარი აზრი, თითქოს კახოვკის ინციდენტმა შეიძლება რაიმე ტიპის, განსაკუთრებით, ბაქტერიოლოგიური გავლენა მოახდინოს საქართველოს წყლებზე.
„...ის წყალი რომ აქ ჩამოვიდეს, მინიმუმ ალბათ სამი თვე სჭირდება, თუ დინების სიჩქარეს დავთვლით 30 სმ/წამში. ასე მარტივად არ არის, რომ პირდაპირ წყალი ჩვენთან მოდიოდეს. რაც შეეხება ბაქტერიოლოგიური განზავების მაჩვენებლებს, შეუძლებელია, რომ იქიდან ჩვენამდე ჩამოვიდეს ბაქტერია და ზიანი მოგვაყენოს", – განაცხადა მიქელაძემ.
გარემოს ეროვნული სააგენტოს წარმომადგენელმა გამორიცხა იმის ალბათობაც, რომ გარემო ან თევზი მძიმე მეტალებით დაბინძურდება.
საქართველოს შავი ზღვის აკვატორიის ბოლო შემოწმების შედეგების თანახმად, აღებული სინჯები ნორმის ფარგლებშია. ქართველი სპეციალისტები შავი ზღვის წყლის ხარისხის მონიტორინგს ცხრა სადგურზე ათ დღეში ერთხელ ახორციელებენ.
ივლისში აჭარის სანაპირო ზოლში ზღვის წყლის ბაქტერიოლოგიურმა კვლევებმა აჩვენა, რომ იგი შეესაბამება ყველა დადგენილ ნორმას. როგორც ყოველთვის, ყველაზე უკეთესი მაჩვენებლები დაფიქსირდა სარფი–კვარიათისა და მახინჯაური–მწვანე კონცხის ტერიტორიებზე, დადებითი მაჩვენებლებია სხვა დანარჩენ წერტილებშიც.