თბილისი, 21 ივნისი — Sputnik. საქართველო აქტიურად ემზადება ერთიანი ეროვნული გამოცდების ჩასატარებლად – პროგრამები ტესტებით უკვე ჩატვირთულია ლეპტოპებში, დაბეჭდილია ფურცლები პასუხებით და დამხმარე მასალები აბიტურიენტებისთვის, მიმდინარეობს მათი განაწილება საგამოცდო ცენტრებში, იუწყება განათლების სამინისტროს პრეს-სამსახური.
უმაღლეს სასწავლებლებში მისაღები გამოცდები საქართველოში 3 ივლისს დაიწყება და 26 ივლისს დამთავრდება.
საგამოცდო პროცესთან დაკავშირებული ყველა საკითხი განიხილეს ერთიანი ეროვნული გამოცდების საორგანიზაციო ჯგუფის სხდომაზე, რომელიც განათლებისა და მეცნიერების მინისტრის მოადგილის გელა გელაძის ხელმძღვანელობით გაიმართა.
საორგანიზაციო ჯგუფი, რომელიც გამოცდების მაღალ დონეზე ჩატარების უზრუნველყოფაზე მუშაობს, ყოველწლიურად იქმნება და კომპლექტდება მთავრობის ადმინისტრაციის, განათლების სამინისტროს, შეფასებისა და გამოცდების ეროვნული ცენტრის, შსს-ს, ჯანდაცვის, იუსტიციის სამინისტროების, მანდატურთა სამსახურისა და სხვა უწყებების წარმომადგენლებით.
საორგანიზაციო ჯგუფის სხდომაზე განხილულ საკითხთა შორის იყო საგამოცდო ცენტრებისთვის ელექტროენერგიის უწყვეტი მიწოდება, სასწრაფო დახმარების და სახანძრო მანქანებით უზრუნველყოფა, საგამოცდო ცენტრებისკენ მიმავალი გზების, ასევე ტრანსპორტის მოწესრიგება და სხვ.
მიმდინარე კვირიდან შეფასებისა და გამოცდების ეროვნული ცენტრი იწყებს 24 საგამოცდო ცენტრის შესაბამისი ინვენტარით აღჭურვის პროცესს. ამ ეტაპზე მიმდინარეობს საგამოცდო ცენტრებში ვიდეოკამერების მონტაჟი, ასევე კომპიუტერული და ელექტროქსელების დასამონტაჟებლად საჭირო მასალების ტრანსპორტირება.
წელს საგამოცდო ცენტრები გაიხსნება: თბილისში, ბათუმში, ზუგდიდში, ქუთაისში, ფოთში, ახალციხეში, გორში, ოზურგეთში, რუსთავში, თელავში, ხულოსა და ამბროლაურში.
აბიტურიენტები აბარებენ სამ სავალდებულო გამოცდას: ქართულ ენასა და ლიტერატურაში, უცხოურ ენაში და ერთ საგანს – არჩევით.
2023 წლის ერთიანი ეროვნული გამოცდებისათვის რეგისტრაცია 45 ათასზე მეტმა აბიტურიენტმა გაიარა. პირველი გამოცდა ჩატარდება ქართულ ენასა და ლიტერატურაში. ერთიან ეროვნულ გამოცდებში მონაწილეობის ღირებულებაა 10 ლარი ერთი გამოცდისთვის.