თბილისი, 8 ივნისი — Sputnik. შეერთებული შტატების განკარგულებაში არ არის არამიწიერი კოსმოსური ხომალდები ან მათი ნამსხვრევები, განუცხადა პენტაგონის პრეს-სამსახურის წარმომადგენელმა სუზან გოფმა „რია ნოვოსტის“.
მანამდე NewsNation-მა გამოაქვეყნა სტატია, რომელშიც გეოსკოსმოსური დაზვერვის ეროვნული სააგენტოს ყოფილმა თანამშრომელმა და აშშ-ის საჰაერო ძალების ვეტერანმა დევიდ გრაშმა განაცხადა, რომ შეერთებულ შტატებს უცხოპლანეტური კოსმოსური ხომალდები ჰყავს. მისი თქმით, ვაშინგტონმა ისინი საიდუმლო სამხედრო პროგრამის ფარგლებში მოიპოვა.
„ამ დროისათვის საჰაერო ძალების სპეციალურმა საგამოძიებო ოფისმა ვერ აღმოაჩინა ინფორმაცია იმის დასტურად, რომ ახლა ან წარსულში არსებობდა რაიმე პროგრამა, რომელიც არამიწიერი ობიექტების ფლობას ან აღდგენას შეეხება“, — განმარტა პენტაგონის წარმომადგენელმა.
როგორც უწყებაში აღნიშნეს, პენტაგონი მოხარული იქნებოდა გასაუბრებოდა ნებისმიერ ამჟამინდელ ან ყოფილ თანამშრომელს, რომელსაც მიაჩნია, რომ გარკვეულ ინფორმაციას ფლობს.
პრეს-სამსახურის წარმომადგენლის თქმით, აშშ-ის თავდაცვის სამინისტრო ვალდებულია გასწიოს ასეთი სამუშაო კონგრესის მოთხოვნით და ახლა შესაბამის ანგარიშს ამზადებს. მოხსენების პრეზენტაცია, სავარაუდოდ, 2024 წლის ივნისში შედგება.
წყარო: „რია ნოვოსტი“