თბილისი, 2 ივნისი – Sputnik. უკრაინის ხელისუფლების ცალკეული წარმომადგენლების განცხადებები საქართველოში მეორე ფრონტის გახსნასთან დაკავშირებით ჩვენი ქვეყნის მოქალაქეებისთვის მიუღებელია, განაცხადა მმართველი პარტია „ქართული ოცნება - დემოკრატიული საქართველოს“ დეპუტატმა რატი იონათამიშვილმა.
საქართველოს ხელისუფლება კონფლიქტის დაწყებისთანავე ქართული ოპოზიციისა და ოფიციალური კიევის წარმომადგენლების მხრიდან კრიტიკის ობიექტი გახდა. თავდაპირველად მიზეზი იყო უკრაინაში მოხალისეების გაგზავნის ორგანიზებაზე უარის თქმა. ხელისუფლებამ განაცხადა, რომ ეს ნიშნავს ქვეყნის ჩართვას შეიარაღებულ კონფლიქტში, რასაც ქვეყნისთვის კატასტროფული შედეგები მოჰყვებოდა.
მოგვიანებით ქართულმა ოპოზიციამ და ოფიციალური კიევის წარმომადგენლებმა დაიწყეს საქართველოს ხელისუფლების დადანაშაულება რუსეთის დახმარებაში საერთაშორისო სანქციების გვერდის ავლაში.
„სამწუხაროდ, ცალკეული უკრაინელი მაღალჩინოსნის მხრიდან არაერთხელ მოვისმინეთ განცხადებები, რომელიც თითოეული ქართველისთვის მიუღებელი უნდა ყოფილიყო – როცა საუბარი იყო მეორე ფრონტსა და საომარი სივრცის საქართველოში გადმოტანაზე. ფაქტია, რომ ამის შესახებ პირდაპირი განცხადებები კეთდებოდა“, – განაცხადა იონათამიშვილმა.
ამასთან, დეპუტატმა აღნიშნა, რომ ქართული მხარე მაქსიმალურად თავშეკავებულად იქცევა და „დისკუსიის სიღრმეებში შესვლა მიზანშეწონილად“ არ მიაჩნია.
ბოლო დროს საერთაშორისო პარტნიორები საქართველოს მთავრობას ნეიტრალური პოზიციის გამო ხშირად აკრიტიკებენ. ამასთან დაკავშირებით ხელისუფლებამ განმარტა, რომ ატარებს პრაგმატულ პოლიტიკას და საქართველოში მეორე ფრონტის გახსნის თავიდან აცილება სურს.
უკრაინაში კონფლიქტის დაწყებისთანავე საქართველოს ხელისუფლებამ განაცხადა, რომ რუსეთის წინააღმდეგ სანქციებს არ დააწესებს, რადგან ამით მხოლოდ თავად საქართველო დაზარალდება. ამასთან, საქართველოს ხელისუფლება სისტემატურად აცხადებს, რომ ქვეყანა იცავს საერთაშორისო ანტირუსულ სანქციებს ფინანსებთან და საზღვარზე საქონლის გადაადგილებასთან დაკავშირებით.