თბილისი, 23 მაისი — Sputnik. შავი ზღვის ფსკერზე წყალქვეშა ელექტროკაბელის გაყვანის ისტორიული პროექტის შესწავლის ეტაპის ყველა კომპონენტი 2023 წლის ბოლოსთვის დასრულდება, განაცხადა ფინანსთა მინისტრმა ლაშა ხუციშვილმა.
აზერბაიჯანის, საქართველოს, რუმინეთისა და უნგრეთის მთავრობებმა 2022 წლის 17 დეკემბერს ხელი მოაწერეს შეთანხმებას „მწვანე ენერგეტიკისა და ტრანსპორტის განვითარების სფეროში სტრატეგიული პარტნიორობის შესახებ“, რომელიც შავი ზღვის ფსკერზე ელექტროგადამცემი ხაზის გაყვანას ითვალისწინებს.
„წლის ბოლოსთვის სრულად უნდა იქნას დასრულებული შესწავლის ეტაპის ყველა კომპონენტი და, შესაბამისად, ამის შემდგომ ჩვენ შევძლებთ გადავიდეთ კონკრეტულ ნაბიჯებზე როგორც დაფინანსების ნაწილში, ისე მივიღოთ გადაწყვეტილება შესრულების ტექნიკურ ნაწილთან და ფინანსურ სტრუქტურასთან მიმართებით", – განაცხადა ხუციშვილმა.
შავი ზღვის ფსკერზე წყალქვეშა კაბელის გაყვანის პროექტი საქართველოს მთავრობის მხარდაჭერით და საქართველოსა და რუმინეთის გადამცემი სისტემის ოპერატორების „საქართველოს სახელმწიფო ელექტროსისტემის" და „ტრანსელექტრიკის“ თანამშრომლობით განხორციელდება.
ამ ეტაპზე „საქართველოს სახელმწიფო ელექტროსისტემა“ საკონსულტაციო კომპანია CESI-ს დახმარებით ახორციელებს პროექტის ტექნიკურ-ეკონომიკურ კვლევას. სამომავლოდ პროექტის ფარგლებში ასევე ჩატარდება გარემოზე და სოციალური ზემოქმედების შეფასებისა და შავი ზღვის ფსკერის გეოფიზიკური და გეოტექნიკური კვლევები.
მათი მეშვეობით დადგინდება პროექტის პრაქტიკული განხორციელების შესაძლებლობები და საუკეთესო გზები. კომიტეტი განიხილავს CESI-ს მიერ მომზადებულ პრეზენტაციას, რომელიც ასახავს მიმდინარე და დაგეგმილ აქტივობებს ტექნიკურ-ეკონომიკური დასაბუთების კვლევის ფარგლებში.
პროექტის განხორციელება ხელს შეუწყობს ევროპისა და კავკასიის რეგიონის ენერგეტიკული უსაფრთხოების განმტკიცებას, განახლებადი ენერგიის სექტორის განვითარებას და გაზრდის სატრანზიტო შესაძლებლობებს.
მსოფლიო ბანკი შავის ზღვის ფსკერის დეტალური კვლევისთვის საქართველოს დამატებით 75 მლნ დოლარს გამოუყოფს.
თუ პროექტი განხორციელდება, ათასი მეგავატი სიმძლავრის 1195 კმ-იანი კაბელი საქართველოს აღმოსავლეთ ბალკანეთთან დააკავშირებს, რაც სამხრეთ კავკასიას და ევროპას საშუალებას მისცემს, ისარგებლონ ფართო საექსპორტო შესაძლებლობებით და განახორციელონ ელექტროენერგიის იმპორტი ელექტროენერგიის ბაზრის საათობრივი ფასების გათვალისწინებით.