თბილისი, 18 მაისი — Sputnik. საქართველო დაზარალდება ეკონომიკური და სამხედრო თვალსაზრისით, თუ რუსეთის წინააღმდეგ სანქციებს დააწესებს, მიიჩნევს პარლამენტის პირველი ვიცე-სპიკერი, მმართველი პარტია „ქართული ოცნების" წარმომადგენელი გია ვოლსკი.
საქართველოს ხელისუფლება სისტემატურად აცხადებს, რომ ქვეყანა იცავს რუსეთის წინააღმდეგ დაწესებულ საერთაშორისო სანქციებს, რაც ფინანსებსა და საზღვარზე საქონლის გადაადგილებას უკავშირდება, თავად საქართველოს ხელისუფლება კი რუსეთის წინააღმდეგ სანქციების დაწესებას არ აპირებს, რადგან ეს მხოლოდ საქართველოს დააზარალებს.
„გვიკიჟინებენ, რომ სანქცირების რეჟიმში გადავიდეთ, თუმცა ამით საქართველო ეკონომიკურად დაზარალდება და დიდი საფრთხეა, დაზარალდეს სამხედრო თვალსაზრისითაც. აგრესიას და საზღვრების გადაწევას ვგულისხმობ", – განუცხადა ვოლსკიმ ჟურნალისტებს.
მან ასევე გაიხსენა, რომ საქართველომ თავის დროზე გადამწყვეტი სიტყვა თქვა ვაჭრობის მსოფლიო ორგანიზაციაში რუსეთის გაწევრიანების პროცესში, სამაგიერო კი არაფერი მიუღია.
რუსეთი ვმო-ს სრულუფლებიანი წევრი 2012 წლის 22 აგვისტოს გახდა. მანამდე საქართველო ორგანიზაციის ერთადერთი წევრი იყო, რომელთანაც რუსეთი ორმხრივი შეთანხმების ხელმოწერას ვერ ახერხებდა.
ვოლსკის თქმით, ამჟამინდელი ხელისუფლებისთვის სამაგიეროდ რამის მიღება – ეს ასობით ათასი თანამემამულის ინტერესებია, "რომ სამჯერ მეტი თანხა არ გადაიხადონ, რათა თავის სამშობლოში ჩამოვიდნენ".
„საქართველოს სხვა ინტერესი არ გააჩნია", – აღნიშნა ვოლსკიმ.
ოპოზიცია და ზოგიერთი დასავლელი პოლიტიკოსი საქართველოს რუსეთის წინააღმდეგ სანქციების დაწესებისკენ მოუწოდებს. მაგალითად, მას შემდეგ, რაც ცნობილი გახდა რუსეთსა და საქართველოს შორის პირდაპირი ავიარეისების აღდგენის შესახებ, ევროკავშირმა მოუწოდა საქართველოს ხელისუფლებას, შეუერთდეს ევროკავშირისა და სხვა ქვეყნების სანქციებს რუსეთის წინააღმდეგ ავიაციის სექტორში და ყურადღებით იყოს, რომ აღიკვეთოს სანქციების თავის არიდების ნებისმიერი მცდელობა.
რუსეთის პრეზიდენტის ვლადიმირ პუტინის ბრძანებულებით 10 მაისიდან გაუქმდა საქართველოსთან პირდაპირი ავიამიმოსვლის აკრძალვა და ტუროპერატორებისა და ტურაგენტებისთვის გაცემული რეკომენდაციები, თავი შეიკავონ საქართველოში ტურების გაყიდვისგან.
ავიამიმოსვლა საქართველოსა და რუსეთს შორის მოსკოვმა ცალმხრივად 2019 წელს შეწყვიტა. ამის საბაბი იყო თბილისში გამართული მასობრივი საპროტესტო აქციები საქართველოს პარლამენტის შენობაში რუსეთის სახელმწიფო სათათბიროს დეპუტატის სერგეი გავრილოვის გამოჩენის შემდეგ.
რუსეთის პრეზიდენტ ვლადიმირ პუტინის ბრძანებულება სავიზო რეჟიმის გაუქმების შესახებ 15 მაისს ამოქმედდა. ბრძანებულების თანახმად, საქართველოს მოქალაქეები რუსეთში შესვლას შეძლებენ მოქმედი დოკუმენტების საფუძველზე და იქ დარჩენას ყოველი 180 დღიდან ჯამში 90 დღის განმავლობაში.
საქართველოსა და რუსეთს შორის დიპლომატიური ურთიერთობები არ არსებობს. ის ქართულმა მხარემ 2008 წლის აგვისტოს ომის შემდეგ გაწყვიტა, როდესაც მოსკოვმა ცხინვალის რეგიონისა და აფხაზეთის დამოუკიდებლობა აღიარა.
ქვეყნებს შორის დიალოგი მხოლოდ ჟენევის დისკუსიებისა და პრაღის რეგულარული შეხვედრების ფარგლებშია შენარჩუნებული, რომლებსაც საქართველოს პრემიერ-მინისტრის სპეცწარმომადგენელი ზურაბ აბაშიძე და რუსეთის დუმის ფედერაციის საბჭოს წევრი გრიგორი კარასინი მართავენ.