თბილისი, 6 მაისი — Sputnik. 2022 წელს გერმანიაში ლეგალურ სამუშაოზე საქართველოს 1.231 მოქალაქე გაემგზავრა, ნათქვამია დასაქმების სახელმწიფო სააგენტოს ანგარიშში.
2021 წლის 1 აპრილიდან საქართველოს მოქალაქეებს შეუძლიათ საზღვარგარეთ ლეგალურად გამგზავრება სეზონურ სასოფლო-სამეურნეო სამუშაოებზე. დასაქმებისთვის მათ რეგისტრაცია უნდა გაიარონ სპეციალურ ვეგვერდზე.
უწყების ანგარიშის თანახმად, 2021 წელს გერმანიაში სამუშაოდ გაემგზავრა 308 მოქალაქე, 2022 წელს – 1.231 მოქალაქე.
გარდა ამისა, გრძელდება ისრაელში დასაქმების მსურველთა განცხადებების მიღება. მათთვის შემუშავდა ხანდაზმულთა მოვლის ახალი კურსი, რომლის გავლის შემდეგაც ისრაელში სამუშაოდ გამგზავრებას საქართველოს ათასი მოქალაქე შეძლებს.
საქართველომ უკვე დაასრულა მოლაპარაკებები საფრანგეთთან საქართველოს მოქალაქეთა ლეგალური დასაქმების თაობაზე, რომლის თანახმად, საფრანგეთის ერთ-ერთ რეგიონში დაიწყება საპილოტო პროგრამა, რომელშიც მონაწილეობის მიღებას და სეზონური სამუშაოს დაწყებას საქართველოს 100 მოქალაქე შეძლებს.
საქართველოს მთავრობამ ხელი მოაწერა ასევე შეთანხმებას ბულგარეთში საქართველოს მოქალაქეთა ლეგალურად დასაქმების შესახებ, ხოლო მოლაპარაკებებს აწარმოებს პორტუგალიასთან, ესპანეთთან, ჩეხეთთან, ხორვატიასთან, კვიპროსთან, უნგრეთთან, ფინეთთან, საბერძნეთთან და ბელგიასთან.
სხვადასხვა ქვეყანაში მოქალაქეების ლეგალურ სამუშაოზე გაგზავნის გადაწყვეტილება საქართველოს მთავრობამ ქვეყანაში უმუშევრობის მაღალი დონისა და საკმარისი სამუშაო ადგილების შექმნის შესაძლებლობის არარსებობის გამო მიიღო.